ԵԱՀԿ գործող նախագահ և Ֆինլանդիայի արտաքին գործերի նախարար Էլինա Վալտոնենը տուգանվել է 5000 լարիով՝ Ռուսթավելի պողոտան անօրինական կերպով փակելու համար: Այս տեղեկատվությունը հաստատել է Վրաստանի Ներքին գործերի նախարարությունը:
Հոկտեմբերի 14-ին Վալտոնենը մասնակցել է Վրաստանի խորհրդարանի շենքի դիմաց կազմակերպված բողոքի ակցիային: Ռուսթավելի պողոտայից նա նաև տեսաուղերձ է հրապարակել սոցիալական ցանցերում:
Այսօր Ֆինլանդիայի արտաքին գործերի նախարար Էլինա Վալտոնենը դիմել է Վրաստանի վարչապետ Իրակլի Կոբախիձեին հետևյալ խոսքերով.
«Ես ձեզ հրավիրում եմ Ֆինլանդիա՝ հանդիպելու ազատ մամուլի հետ և հետևելու ձեր կողմից նախընտրած ցանկացած ցույցի»։
Ավելի վաղ Վրաստանի արտաքին գործերի նախարարությունը մտահոգություն էր հայտնել Էլինա Վալտոնենի այցի վերաբերյալ և բողոքի նոտա էր հղել ԵԱՀԿ քարտուղարությանը և մասնակից պետություններին։ Նոտայում նշվում էր, որ իր պաշտոնական այցի համար նախատեսված ծրագրից բացի, նախարար Վալտոնենը միացել է հակակառավարական ակտիվիստների փոքր խմբի կողմից կազմակերպված փողոցային բողոքի ցույցին և հայտարարություն է արել, ինչը միջազգային հանրությանը Վրաստանում ստեղծված իրավիճակի վերաբերյալ մոլորեցնելու փորձ է։
