Նինոծմինդայի մունիցիպալիտետի Գորելովկա գյուղի 41-րդ ընտրատարածքի թիվ 12 ընտրատեղամասում ռուսներին «օգնեցին» քվեարկել։

Գորելովկան ինքնատիպ գյուղ է, որտեղ ապրում են հայեր, Աջարիայից եկած վրացի էկոմիգրանտներ և ռուս դուխոբորներ։ Եթե պետությունը հայերին և վրացիներին հնարավորություն տվեց քվեարկել՝ ստանալով քվեաթերթիկներն իրենց մայրենի լեզուներով, ապա այս հանգամանքը հաշվի չառնվեց ռուս դուխոբորների դեպքում։

Գորելովկայի ընտրատեղամաս մտավ մի տարեց զույգ։ Հանձնաժողովը հայտարարեց, որ ազգությամբ հայ տղամարդը պետք է օգնի նրանց, քանի որ նրանք վատ են տեսնում։ Սակայն, այն բանից հետո, երբ տղամարդը «օգնեց» նրանց կատարել իրենց ընտրությունը, մենք հարցրեցինք տարեց զույգին, թե արդյոք նրանք իսկապես տեսողության խնդիրներ ունեն։ Նրանք պատասխանեցին, որ ոչ։ Այնուամենայնիվ, լրագրողի հետագա հարցը զայրացրեց հանձնաժողովի անդամներին։

Սա միակ դեպքը չէր, երբ ռուսական ծագում ունեցող ընտրողին ուղեկցում էին այս ընտրատեղամաս։ Նմանատիպ իրավիճակում քվեարկեց նաև մի կին։ Հանձնաժողովը կրկին պնդեց, որ ընտրողը վատ տեսողություն ունի և այս անգամ լրագրողներին ուղղորդեց նրա մոտ։ Սակայն, ինչպես նախորդ դեպքում, կինը պատասխանեց, որ իր տեսողությունը լավ է, սակայն նրան պարզապես օգնություն է պետք քվեարկելու ձևը հասկանալու համար։

Դրանից հետո հանձնաժողովի անդամները՝ գյուղապետ Մնացական Բաբաջանյանի գլխավորությամբ, որը գրանցված էր որպես դիտորդ, վեճ սկսեցին լրագրողի հետ՝ պահանջելով, որ նա մեկ ժամը լրանալուն պես լքի ընտրատեղամասը, քանի որ, ըստ նրանց, նա իրավունք չուներ այնտեղ մնալու։

Նշենք, որ միջադեպից առաջ Մնացական Բաբաջանյանն ազատորեն տեղաշարժվում էր ընտրատեղամասով՝ առանց Կենտրոնական ընտրական հանձնաժողովի կողմից տրված հավատարմագրման քարտի՝ խախտելով ընտրատեղամասում գտնվելու կանոնները։ Նրա մոտ հավատարմագրման քարտն ի հայտ եկավ միայն այն բանից հետո, երբ Jnews-ի լրագրողը հետաքրքրվեց տվյալ փաստաթղթի բացակայության մասին։