Այսօր Թբիլիսիում բողոքի ցույց կանցկացվի՝ տեղական ինքնակառավարման մարմինների ընտրություններին զուգահեռ։

Ցույցը կազմակերպում են ութ ընդդիմադիր կուսակցություններ, որոնք բոյկոտում են գործընթացը։ Այս ուժերը չեն ճանաչում 2024 թվականի խորհրդարանական ընտրությունների արդյունքները և «Վրացական երազանքի» կառավարությունը համարում են ոչ լեգիտիմ։ Նրանց առաջնորդները ներկայումս բանտում են։
Հանրահավաքը կսկսվի ժամը 16:00-ին Վրաստանի խորհրդարանի մոտ։ Դրան կմիանան մի քանի երթեր քաղաքի տարբեր կետերից։ Դրանցից մեկը՝ ուսանողական երթը, կմեկնարկի ժամը 15:00-ին Թբիլիսիի պետական համալսարանի 1-ին մասնաշենքից։ Մարզերի բնակիչների համար ապահովվել է անվճար տրանսպորտ։ Վերջին շաբաթներին ընդդիմությունն ակտիվորեն շրջագայում է երկրի տարբեր քաղաքներում՝ կոչ անելով քաղաքացիներին դուրս գալ փողոցներ։

Որոշ բիզնեսներ նույնպես աջակցություն են հայտնել: Որոշ բարեր և ռեստորաններ հայտարարել են, որ այսօր կփակվեն, որպեսզի իրենց աշխատակիցները կարողանան մասնակցել բողոքի ակցիային: Վրաստանի ամենամեծ ակումբը՝ «Բասիանին», մեկ շաբաթով հետաձգել է իր 11-ամյակին նվիրված տոնակատարությունը՝ նշելով. «Հոկտեմբերի 4-ին մենք դուրս կգանք փողոց: Կոչ ենք անում բոլորին հավաքվել Ռուսթավելիի պողոտայում ժամը 16:00-ին կայանալիք ցույցին»:

Նախկին նախագահ Սալոմե Զուրաբիշվիլին ենթադրել է, որ հանրահավաքը կարող է ներգրավել ավելի քան 200 հազար մարդու:

Վրաստանում բողոքի շարժումը շարունակվում է գրեթե մեկ տարի։ Այն սկսվել է 2024 թվականի հոկտեմբերի վիճարկվող խորհրդարանական ընտրություններից հետո, իսկ նոր ալիք է բարձրացրել վարչապետ Իրակլի Կոբախիձեի՝ ԵՄ անդամակցության բանակցությունները կասեցնելու որոշումը։ Չնայած սկզբում բողոքի ցույցերը լայնածավալ էին, վերջին ամիսներին դրանք ներգրավում էին ավելի փոքր թվով մասնակիցների։ Իշխանություններն օրենքներ են ընդունել, որոնք սահմանափակում են ԶԼՄ-ների և քաղաքացիական կազմակերպությունների աշխատանքը և խստացրել են հանրահավաքների կանոնակարգերը։ Amnesty International-ը իրավիճակն անվանել է «լայնածավալ բռնաճնշումների արշավ»։

Ընդդիմությունը տարբեր գնահատականներ ունի այսօրվա բողոքի ակցիայի վերաբերյալ. ոմանք այն անվանում են «խաղաղ հեղափոխություն», իսկ մյուսները հիմնական նպատակը տեսնում են նրանում, որ ընտրողներն անտեսեն ընտրություննեը: Այնուամենայնիվ, Վրաստանում չկա մասնակցության իրավական շեմ, և ընտրությունները տեղի կունենան անկախ մասնակցության մակարդակից:

Իշխանություններն արդեն իսկ կոշտ դիրքորոշում են հայտնել։ Սեպտեմբերի 11-ին Պետական անվտանգության ծառայությունը ձերբակալել էր հանրահավաքի հիմնական կազմակերպիչներից մեկին՝ «Ազգային շարժման» նախկին առաջնորդ Լևան Խաբեշվիլիին՝ մեղադրելով նրան կառավարությունը տապալելու կոչերի և ոստիկաններին կաշառելու փորձի մեջ։ Հոկտեմբերի 1-ին Թբիլիսիի սակրեբուլոյի անդամ Զվիադ Կուպրավան ձերբակալվեց տեսանյութ հրապարակելուց հետո, որում նա, ի թիվս այլ բաների, քննարկում էր ընտրատեղամասերի հնարավոր արգելափակումը։

Կառավարությունը զգուշացնում է, որ ապակայունացման ցանկացած փորձ խստորեն կճնշվի։

Աղբյուրը՝ Newsgeorgia