Մինչդեռ շատ մունիցիպալիտետներում, այլ կուսակցություններից թեկնածուների բացակայության պատճառով, «Վրացական երազանքի» թեկնածուներին այլընտրանք չկա տեղական ինքնակառավարման մարմինների ընտրություններում, առանձնանում է նախաձեռնող խմբից անկախ թեկնածու Եղիշե Մկրտչյանի առաջադրումը Նինոծմինդայի մունիցիպալիտետի սակրեբուլոյի թիվ 41.09 մեծամասնական Տամբովկայի ընտրատարածքում։

Վրաստանում գրանցված է 39 նախաձեռնող խումբ, որոնք առաջադրել են անկախ թեկնածուներ։ Նրանցից մեկը Նինոծմինդայի մունիցիպալիտետում է։ Խմբում ընդգրկված են Մայիս Էլոյանը, Նիկոլայ Փոլոյանը, Շոթա Արոյանը, Մանուկ Կարագյոզյանը և Էդուարդ Հարությունյանը։

Jnews-ին տված հարցազրույցում անկախ թեկնածու Եղիշ Մկրտչյանը ընտրություններին իր մասնակցությունը մեկնաբանել է հետևյալ կերպ.

«Ես միշտ եղել եմ պետության կողմից, երբեք ընդդիմության մեջ չեմ եղել, բայց որոշեցի առաջադրել իմ թեկնածությունը։ Եթե անցնեմ, լավ է, եթե ոչ, դա էլ վատ չէ։ Ինձ համար գլխավորը մարդկանց կյանքը բարելավելն է։ Մնացած հարցերին կպատասխանեմ ընտրվելուց հետո։ Ես դրական եմ գնահատում իմ հնարավորությունները, որոշում է ժողովուրդը», — նշեց նա։

Ախալքալաքում նախաձեռնող խումբ չկա։ Սամցխե-Ջավախքի տարածաշրջանից մեկական նախաձեռնող խումբ գրանցվել է Բորժոմիում և Նինոծմինդայում, երեք խումբ՝ Խաշուրիում, երկու նախաձեռնող խումբ՝ Ծալկայի մունիցիպալիտետում, մեկական՝ Մառնեուլիում և Գարդաբանիում։