Ախալքալաք քաղաքի օրը սկսել են նշել 2017 թվականին՝ ամենալավ և ամենաջերմ ժամանակահատվածում՝ աշնան սկզբին։ Այս տարի Քաղաքի օրը նշվեց Ախալքալաքի բնակիչների սիրելի վայրում՝ հին քաղաքում, «Խաս Բախչա» զբոսայգում։
Զբոսայգին զարդարված էր դրոշներով, մի մասում կային ցուցահանդեսի համար վայրեր, որտեղ տարբեր քաղաքային կրթական կազմակերպություններ ցուցադրեցին իրենց հմտություններն ու արդյունքները՝ թանգարան, Ապագայի տուն, Հայկական երիտասարդական կենտրոն և այլն։ Տեղեր հատկացվեցին նաև առևտրի համար։ Քաղաքի մեկ այլ մասում կար խաղահրապարակ, բեմ, «Պույ-Պույ» տիկնիկային թատրոնը ցուցադրեց հեքիաթ, և երեխաները կարող էին խաղալ տարբեր խաղեր։ Տոնական միջոցառումները բացեցին թմբկահարներն ու անիմատորները։ Դրանից հետո Ախալքալաքի քաղաքապետ Մելքոն Մակարյանը շնորհավորեց քաղաքացիներին տոնի կապակցությամբ։
«Այսօր մենք բոլորս միասին նշում ենք Ախալքալաքի օրը։ Քաղաք, որը դարեր շարունակ եղել է մեր ուժի, հավատքի և խաղաղության վայրը։ Ախալքալաքը մեր հայրենիքն է, մեր տունը, մեր ապագան։ Այստեղի գեղեցկությունը ոչ միայն հին ավանդույթների և հին պատմության մեջ է, այլև այստեղ ապրող և ստեղծագործող մարդկանց մեջ։ Հայ-վրացական բարեկամություն, դարեր շարունակ մենք զարգացրել ենք այս հողը՝ հարգելով միմյանց, ամրապնդվելով, դրել ենք այս քաղաքի հիմնաքարը։ Ախալքալաքը եղել և մնում է ամուր համայնքի, մշակույթի, բարեկամության և խաղաղության օրինակ։ Այսօր մենք կանգնած ենք մեկ սրտով և հոգով, մեկ նպատակով՝ պահպանել և զարգացնել մեր քաղաքը։ Թող մեր քաղաքը լինի խաղաղության, սիրո և բարեկամության խորհրդանիշ։ Շնորհավոր տոնդ, իմ սիրելի քաղաք՝ Ախալքալաք, բարգավաճի՛ր և զարգացի՛ր մեր համատեղ ջանքերով», — ասաց Ախալքալաքի քաղաքապետը։
Սամցխե-Ջավախքի նահանգապետ Զաալ Գելաշվիլին և Վրաստանի կրթության փոխնախարար Զվիադ Գաբիսոնիան նույնպես շնորհավորեցին բնակիչներին: Հյուրերը, Ախալքալաքի ռեսուրս կենտրոնի հետ համատեղ, Ախալքալաքի մունիցիպալիտետի դպրոցների մեդալակիրներին հանձնեցին ոսկե և արծաթե մեդալներ:
Դրան հաջորդեցին իլյուզիոնիստի ելույթը, տեղի պարողների և երգի համույթների համերգը։ Հարկ է նշել, որ համայնքի բոլոր գյուղերը փառատոնի հյուրերին հյուրասիրեցին՝ սեղաններ գցելով տարբեր ավանդական ուտեստներով։
Օրն ավարտվեց «Goofy Land» խմբի ելույթով և տոնական հրավառությամբ։
Նշենք, որ 2025 թվականի բյուջեում քաղաքի օրվա տոնակատարության համար սկզբնապես հատկացվել էր 75 000 լարի։ Հետագայում, բյուջեում կատարված փոփոխությունների արդյունքում, տոնակատարության համար ավելացվել էր ևս 9 650 լարի։
