Հայաստանի Հանրապետության արտակարգ և լիազոր դեսպան Աշոտ Սմբատյանը և երկրորդ քարտուղար Արեն Առաքելյանը այցելել են Թբիլիսիի պետական բժշկական համալսարան (ԹՊԲՀ)։ Այս մասին տեղեկանում ենք Aliq Media-ից։
Դեսպանին և նրա ուղեկցողներին ընդունել են Թբիլիսիի պետական բժշկական համալսարանի ռեկտոր, պրոֆեսոր Իրակլի Նատրոշվիլին, կանցլեր Ալեքսանդրե Բուաչիձեն, ռեկտորի աշխատակազմի ղեկավար Իրինա Կապետիվաձեն և միջազգային համագործակցության բաժնի ղեկավար, դոցենտ Թինաթին Կիլասոնիան։
Հանդիպման ընթացքում հյուրերին ներկայացվել է Թբիլիսիի պետական բժշկական համալսարանում գործող կրթական գործընթացի կառավարման մոդելը և կլինիկական գործունեությունը։ Համալսարանի ղեկավարությունը մանրամասն տեղեկություն է տրամադրել դիմորդների ընդունելության ընթացակարգերի, ընդունելության քննությունների փուլերի և ֆակուլտետների առանձնահատկությունների վերաբերյալ։
Դեսպան Աշոտ Սմբատյանը հույս է հայտնել, որ հայազգի երիտասարդները հաջողությամբ կշարունակեն իրենց ուսումը Թբիլիսիի պետական բժշկական համալսարանում, ինչը կնպաստի բարձրակարգ և մրցունակ կադրերի պատրաստմանը։
Դեսպանի խոսքով՝ համալսարանում ներդրված նորարարական մոտեցումները, ժամանակակից մեթոդները և միջազգային չափանիշները կօգնեն ուսանողներին լիարժեք ակադեմիական և մասնագիտական զարգացման գործում։
