Կառավարությունը Վրաստանի բասկետբոլի հավաքականին հաջողությունների համար կհատկացնի երեք միլիոն լարի։ Բացի այդ, ձեռք բերված յուրաքանչյուր հաջողության համար կհատկացվի լրացուցիչ երեք միլիոն լարի,- հայտարարել է Վրաստանի վարչապետ Իրակլի Կոբախիձեն։
Կոբախիձեն այսօր կառավարության նիստում շնորհավորել է մարզիկներին պատմական հաջողության կապակցությամբ։
«Ցանկանում եմ շնորհավորել մեր մարզիկներին երեկվա հաղթանակի կապակցությամբ, սա շատ հաջող օր էր մեր երկրի համար։ Նախևառաջ, ցանկանում եմ շնորհավորել բասկետբոլիստներին պատմական հաջողության կապակցությամբ, առաջին անգամ մեր ազգային հավաքականը Եվրոպայի ութ լավագույն թիմերի շարքում է։ Ցանկանում եմ շնորհակալություն հայտնել յուրաքանչյուր բասկետբոլիստի և ամբողջ թիմի, այդ թվում՝ մարզիչների, այս տպավորիչ հաջողության համար։ Ցանկանում եմ շնորհակալություն հայտնել Բասկետբոլի ֆեդերացիային, նման արդյունքները չեն գալիս առանց նվիրվածության և քրտնաջան աշխատանքի։ Ցանկանում եմ նրանց հաջողություն մաղթել ապագայում։ Մեզ սպասվում են կարևոր խաղեր, և վստահ եմ, որ հաջորդ խաղերում նույնպես հաջողությունը մեր կողմը կլինի։ Ցանկանում եմ նաև շնորհավորել ֆուտբոլիստներին երեկվա հաղթանակի կապակցությամբ, տպավորիչ հաղթանակի, և ցանկանում եմ նրանց հաջողություն մաղթել նաև Աշխարհի առաջնության ընտրական մրցաշարում։
Ինչ վերաբերում է բասկետբոլիստներին, հաշվի առնելով, որ մենք ունենք պատմական արդյունք, մենք ցանկանում ենք նշել այս արդյունքը կառավարության կողմից համապատասխան դրամական պարգևատրմամբ, և մենք կարծում ենք, որ արդեն իսկ ձեռք բերված հաջողության համար պետք է հատկացվի 3 միլիոն լարի, իսկ Եվրոբասկետում, Եվրոպայի առաջնությունում հաղթած յուրաքանչյուր հաջորդ խաղի համար՝ առաջնությունում մենք նույնպես կսահմանենք 3 միլիոն լարի։ 3 միլիոն լարի՝ ձեռք բերված արդյունքի համար և 3 միլիոն լարի՝ յուրաքանչյուր հաջորդ հաղթանակի համար։ Նման բոնուս կսահմանվի», – ասաց Իրակլի Կոբախիձեն։
Եվրոբասկետ 2025-ում Վրաստանի հավաքականը հաղթեց Ֆրանսիային և անցավ մրցաշարի քառորդ եզրափակիչ։
