Մեկ ամիս է, ինչ Ախալքալաքի տներում ջուրը հոսում է բարակ շիթով, իսկ որոշ բազմահարկ շենքերում ջուր ընդհանրապես չկա: Ախալքալաքի քաղաքային հիվանդանոցում գրեթե մեկ ամիս է ջուր չկա: Որոշ աղբյուրներ պնդում են, որ պատճառն այն է, որ շոգի և ոռոգման սեզոնի հետ մեկտեղ, Վրաստանի Միացյալ ջրամատակարարման ընկերության Ախալքալաքի սպասարկման կենտրոնի աշխատակիցները, համակարգի հնության պատճառով, Բավրա գյուղի կամրջի մոտ գտնվող ջրի փականը լիովին չեն բացել: Ընկերությունը հերքում է դա, պնդելով, որ խողովակներում ճնշման նվազումը ջրի շատ սպառման հետևանքով է: Ախալքալաքի սեփական տներում ջրի ճնշումն ավելի քան մեկ ամիս է ընկել է, իսկ բազմահարկ շենքերում թույլ ճնշման պատճառով ջուրն ընդհանրապես վերին հարկեր չի բարձրանում: Ամեն տարի ոռոգման սեզոնին քաղաքում նմանատիպ իրավիճակ է, սակայն այս տարի խնդիրն ավելի է սրվել: Սպասարկման կենտրոնը մինչ այժմ լուծում չի գտել, թե ինչպես կանխի խմելու ջրով դաշտերի ոռոգումը։
Իրապես, Ախալքալաքի ջրամատակարարման համակարգը վաղուց հնացած է, բաժանորդներն անընդհատ տառապում են խափանումներից, ու այն լուրջ վերակառուցման կարիք ունի։
Կվերականգնվի արդյոք Ախալքալաքի ջրամատակարարման համակարգը
Քաղաքում ջրի թույլ ճնշման պատճառներից մեկն այն է, որ սպասարկման կենտրոնի աշխատակիցները, խողովակացանցերի վթարներից խուսափելու համար, լիովին չեն բացել Բավրա գյուղի մոտ գտնվող ջրի փականը: Արդյունքում, ջուրը չի բարձրանում բազմահարկ շենքեր առանց պոմպի, իսկ սեփական տներում նրա ճնշումը զգալիորեն նվազել է: Իրավիճակը համընկավ ոռոգման սեզոնի հետ, երբ տներում ջրի ճնշումը միշտ ընկնում է: Սակայն այս տարի թույլ ճնշում նկատվել է նաև գարնանը՝ ոռոգումը սկսվելուց առաջ:
«Թույլ ճնշումը պայմանավորված է նրանով, որ այժմ շատ ջուր է սպառվում։ Սա ժամանակավոր է, փականը դրա հետ կապ չունի», — հայտնեցին Վրաստանի Միացյալ ջրամատակարարման ընկերության թեժ գծից։
Ախալքալաքի քաղաքային հիվանդանոց դեռևս ջուր չի մատակարարվում: Որպեսզի բժշկական հաստատությունը չմնա լիովին առանց ջրի, այն բերում է ՍՊԸ «Սանմաքրում»-ը, բայց ջուրը, միևնույն է, չի բավարարում:
Ախալքալաքի հիվանդանոցը մնացել է առանց ջրի
Ախալքալաքի բնակիչները հույս ունեն, որ իշխանությունները և ջրամատակարարման ընկերությունը կգտնեն լուծում, քանի որ ժամանակավոր միջոցառումները չեն լուծում խնդիրը: Համակարգի արդիականացման բացակայության դեպքում քաղաքը բախվում է ջրամատակարարման ամենամյա ընդհատումների, որոնք հատկապես սուր են զգացվում առօրյա կյանքում և սոցիալական հաստատությունների աշխատանքում:
