Այսօր՝ օգոստոսի 5-ին, Ախալքալաքի Մշակութի տանը տեղի ունեցավ ասմունքի 8-րդ փառատոնը։ Մասնակիցները ասմունքեցին տարբեր ստեղծագործություններ, հնչեցին ինչպես հայերեն, այնպես էլ վրացերեն բանաստեղծություններ:
Ասմունքի փառատոնն անցկացվում էր բարձր տրամադրությամբ ու առանձնահատուկ ջերմությամբ։ Դահլիճը՝ լեփ-լեցուն, աչքի էր ընկնում սպասումով լցված հայացքներով․ այստեղ էին մասնակիցների ծնողները, ընկերները, ուսուցիչներն ու այլ հյուրեր, որոնք իրենց անկեղծ ժպիտներով ու ծափահարություններով քաջալերում էին բեմ բարձրացողներին։
Նրանցից յուրաքանչյուրն ասմունքում էր ինքնատիպ մոտեցմամբ՝ երբեմն զգացմունքային, երբեմն հնչեղ ու տպավորիչ արտահայտումներով։ Ոմանք ընտրել էին ժամանակակից հեղինակների գործեր, իսկ ոմանք՝ դասականներին: Նկատելի էր, թե որքան մեծ նշանակություն ուներ այս օրը յուրաքանչյուր մասնակցի համար։
«Փառատոնին մասնակցել են 47 մասնակից տարբեր տեղերից, իսկ նրանցից 20-ը հասել է այս փուլ, կլինեն հաղթողներ և մրցանակներ: Մինչ այս այսպիսի փառատոնները անցկացնում էինք միջանցքում, բայց ի շնորհիվ մեր շրջանի ղեկավարությանը, վերանորոգվեց Մշակույթի տան 2-րդ հարկի դահլիճը և մենք հնարավորություն ունենք ավելի լավ և հարմարավետ իրականացնելու նմանատիպ միջոցառումները», — Jnews-ի հետ զրույցում նշեց Ախալքալաքի Մշակույթի տան տնօրեն Ալիկ Քսպոյանը:
Բոլոր մասնակիցները ստացան հավաստագրեր:
Ասմունքի փառատոնի Գրան պրիին արժանացավ Եվա Խորշիկյանը։
Առաջին հորիզոնականը զբաղեցրեց Բաբկեն Բերակչյանը։
Երկրորդ հորիզոնականը զբաղեցրեց Անահիտ Մովսիսյանը։
Երրորդ հորիզոնականը զբաղեցրեց Անժելա Մարգարյանը։
Ժյուրիի համակրանքին արժանացավ Սանդրո Արտեմելաձեն:
Միջոցառմանը ներկա էին նաև Ախալքալաքի տեղական ինքնակառավարման մարմինների ներկայացուցիչները:
