Այսուհետ ՀՀ բարձրագույն և հետբուհական մասնագիտական կրթական ծրագրեր իրականացնող ուսումնական հաստատություններում 2025-2026 ուսումնական տարվանից օտարերկրյա դիմորդների ընդունելությունը կատարվում է էլեկտրոնային եղանակով՝ fs.emis.am համակարգի միջոցով:
fs.emis.am էլեկտրոնային հարթակում ներկայացված են բուհերը և կրթական ծրագրերը, մասնագիտությունների ցանկը և կրթական աստիճանները:
Համակարգից օգտվելու քայլերն առավել մանրամասն դիմորդի ուղեցույցում՝
- ինչպե՞ս գրանցվել օտարերկրյա դիմորդների ընդունելության համակարգում,
- ինչպե՞ս կատարել ընտրությունը՝ ըստ մասնագիտության,
- ինչպե՞ս ընտրել և դիմել բուհ,
- ինչպես փոխել գաղտնաբառը կամ էլեկտրոնային փոստի հասցեն,
- ինչպե՞ս վերականգնել գաղտնաբառը,
- ինչպե՞ս չեղարկել կամ խմբագրել հայտը։
Դիմելու ժամկետներ՝
- անվճար առկա ուսուցմամբ բակալավրի կրթական ծրագրով (հայագիտական, մանկավարժական և արվեստի բնագավառի մասնագիտություններ) սփյուռքահայ դիմորդների ընդունելության համար՝ մինչև 2025 թ. օգոստոսի 22-ը ներառյալ,
- վճարովի առկա ուսուցմամբ բակալավրի ու անընդհատ և ինտեգրացված կրթական ծրագրերով, այդ թվում՝ նախապատրաստական դասընթացում ընդունելության համար՝ մինչև 2025 թ. սեպտեմբերի 30-ը ներառյալ,
- վճարովի առկա ուսուցմամբ մագիստրոսի կրթական ծրագրով, այդ թվում՝ նախապատրաստական դասընթացում ընդունելության համար՝ մինչև հոկտեմբերի 10-ը ներառյալ,
- վճարովի հեռակա ուսուցմամբ բակալավրի և մագիստրոսի կրթական ծրագրերով ընդունելության համար՝ մինչև հոկտեմբերի 16-ը ներառյալ,
- վճարովի հետբուհական՝ ասպիրանտի կրթական ծրագրով ընդունելության համար՝ մինչև 2025 թ. նոյեմբերի 14-ը ներառյալ:
Դիմորդները ներկայացնում են հետևյալ փաստաթղթերը՝
- անձնագրի պատճենը,
- սփյուռքահայ դիմորդների համար` ծննդյան վկայականի պատճենը` նոտարով վավերացված կամ մկրտության վկայականի պատճենը,
- կրթական աստիճանի վերաբերյալ ավարտական փաստաթղթի պատճենը (գնահատականներով)` թարգմանված և նոտարական, իսկ առանձին երկրների դեպքում` նաև միջազգային վավերացմամբ (ապոստիլ),
- բժշկական տեղեկանք` ընդհանուր առողջական վիճակի մասին (սույն տեղեկանքը կարող է տրված լինել նաև Հայաստանի Հանրապետության բժշկական կազմակերպությունների կողմից),
- միասնական քննությունների վկայագիր,
- 3×4 չափսի 4 լուսանկար,
- ինքնակենսագրություն (CV)` հայերենով, ռուսերենով կամ անգլերենով,
- հետբուհական մասնագիտական կրթություն ստանալու համար՝ ընտրած մասնագիտության թեմայով գիտական ռեֆերատ` 20 էջի սահմաններում, հայերենով, ռուսերենով կամ անգլերենով:
Լրացուցիչ տեղեկությունների համար դիմել ՀՀ ԿԳՄՍ նախարարություն՝
Սփյուռքի հետ կապերի բաժին՝ (հեռ. +374 10-599-647)
աԱրտաքին կապերի բաժին՝ (հեռ. +374 10-599-646)
Կրթական տեխնոլոգիաների ազգային կենտրոն՝ (հեռ. +374 10-578455) էլ. փոստ՝ info@ktak.am
