Հուլիսի 1-ից Հայաստանից Վրաստան, և հակառակ ուղղությամբ ուղևորափոխադրումներն իրականացվում են հսկիչ փաստաթղթի հիման վրա, որը վերաբերվում է ուղևորների քանակին։
Ախալքալաք-Երևան և հակառակ ուղղությամբ երթևեկող վարորդներից շատերը նշում են, որ սահմանը հատելիս հսկիչ փաստաթուղթ չեն պահանջել և նրանց հետաքրքրում է՝ իրականում գործում է օրենքը թե՞ ոչ, ինչու չեն պահանջում փաստաթուղթը։
Jnews-ը դիմեց Վրաստանում Հայաստանի հանրապետության դեսպանատուն՝ մանրամասն տեղեկություններ ստանալու համար։
Մեր հարցերի պատասխանները ներկայացնում ենք ստորև՝
Օրենքը իսկապես գորրծու՞մ է հիմա։
— Այո, օրենքը հիմա գործում է, կիրառվում է։
Եթե մարդն իր մեքենայով և իր ընտանիքի անդամների հետ է գնում, պետք է լրացնի՞ փաստաթուղթը։
— Ոչ, խոսքը գնում է միայն կոմերցիոն փոխադրումների մասին, վեց և ավելի նստատեղ ունեցող մեքենաների դեպքում։ Եթե մարդը գնում է թեթև մարդատար մեքենայով և իր ընտանիքի անդամների հետ, դա նրան չի վերաբերվի։
Ի՞նչ լեզվով է լրացվելու փաստաթուղթը։
— Հիմնականում լրացվում է անգլերենով և օրինակելի ձևը, որը առկա է տարածքային կառավարության և ենթակառուցվածքների նախարարության կառավարության կայքէջում, նույնպես անգլերեն է տեղադրված։
Քան՞ի հոգու դեպքում է լրացվելու։
— Վեց և ավելի նստատեղ ունեցող մեքենաներին և միայն կոմերցիոն փոխադրումներին է վերաբերվում։ Որոշ դեպքերում, եթե ընտանիքի անդամներ են, դե դա բնականաբար անձնագրերից, ազգանուններից, հայրանուններից երևում է, և որևէ խնդիր չի առաջանում։ Բացի դրանից, վրացական կողմը նաև որոշակի ցանկ ունի, ոչ կանոնավոր փոխադրումներ իրականացնողների, որն իրենց թույլ է տալիս հանգիստ պարզել՝ թե դա ինչպիսի փոխադրում է։
Երբ մարդն իր մեքենայով մի քանի մարդկանց տանում է, օրինակ՝ Երևան (օրինակ տաքսի, ուղղակի չգրանցված), այդ դեպքում ի՞նչ է լինում։
— Եթե դա վեց և ավելի նստատեղ ունեցող մեքենա է և ուղղակի տանում է, ապա այդ դեպքում անհրաժեշտ է լրացնել՝ խնդիրներից խուսափելու համար։
Եթե ուղևորները 6-ից ավելի են ու բոլորը ընտանիքի անդամներ են, այդ դեպքում պե՞տք է լրացնել։
— Այդ դեպքում պետք չէ, որովհետև վրացական կողմը դա դիտում է որպես ոչ կոմերցիոն։
Ընդգծենք, որ Հայաստանի տարածքային կառավարման և ենթակառուցվածքների նախարարությունն ավելի վաղ տարածել էր տեղեկություն նոր օրենքի մասին, ըստ որի՝ 2025 թվականի հուլիսի 1-ից «ՀՀ կառավարության և Վրաստանի կառավարության միջև միջազգային ավտոմոբիլային հաղորդակցության մասին» համաձայնագրի 4-րդ հոդվածի 2-րդ կետի համաձայն՝ Հայաստանի Հանրապետությունից դեպի Վրաստան և հակառակ ուղղությամբ ոչ կանոնավոր ուղևորափոխադրումները պետք է իրականացվեն հսկիչ փաստաթղթի (ուղևորների ցուցակի) առկայությամբ։
