Ռուսաստանի կառավարությունը լիովին արգելել է բենզինի արտահանումը երկրից։ Այս մասին հաղորդվել է Դաշնության Նախարարների կաբինետի Telegram ալիքում, հաղորդում է bpn.ge-ն։

Երկրից բենզինի արտահանումը, այդ թվում՝ արտադրական ընկերությունների համար, արգելված է մինչև օգոստոսի 31-ը։ Նախկինում արգելքը վերաբերում էր միայն թրեյդերներին, միջնորդներին և նավթաբազաներին։

«Արտահանման արգելքի խստացումը անհրաժեշտ է ներքին վառելիքի շուկայում կայունությունը պահպանելու համար՝ սեզոնային բարձր պահանջարկի և գյուղատնտեսական աշխատանքների ժամանակահատվածում», — գրում է կառավարությունը։

Հիշեցնենք, որ Ռուսաստանի շուկայում վառելիքի գները տարեսկզբից ի վեր աճել են 30%-ով և գրեթե հասել են պատմական առավելագույնի։ Բենզինի մեծածախ գների կտրուկ աճը սկսվել է ապրիլին։ Այդ ժամանակից ի վեր Սանկտ Պետերբուրգի միջազգային ապրանքային բորսայում AI-92-ի գինը աճել է 29%-ով՝ հասնելով ավելի քան 65,000 ռուբլու (793 դոլար) մեկ տոննայի դիմաց, մինչդեռ AI-95-ի գինը աճել է 28%-ով՝ հասնելով 73,000 ռուբլու (890 դոլար) մեկ տոննայի դիմաց, ինչը գրեթե գերազանցել է 2023 թվականի ամռանը սահմանված բոլոր ժամանակների ռեկորդը։

Հուլիսի 17-ին էներգետիկայի նախարար Սերգեյ Ցիվիլևը հայտարարել է, որ ռուսական նավթային ընկերությունները պատժամիջոցների պատճառով խնդիրներ են ունենում վերամշակման գործարանների վերանորոգման հետ կապված։ Նրա խոսքով՝ նավթավերամշակման գործարաններում «խափանումները» կապված են սարքավորումների մատակարարման հետ կապված խնդիրների հետ։ Այս մատակարարումներն ենթարկվել են եվրոպական պատժամիջոցների 2022 թվականի փետրվարին՝ Ուկրաինա ներխուժումից հետո պատժամիջոցների առաջին փաթեթի շրջանակներում։

Նախարարը հավելում է, որ պատժամիջոցների պատճառով նավթավերամշակման գործարանների վերանորոգման ժամկետները մեծանում են, և կառավարությունը ստիպված է փոխհատուցել այդ փոփոխությունները։

Ըստ Reuters-ի՝ Ռուսաստանի նավթավերամշակման գործարաններում նավթի վերամշակման ծավալներն անցյալ տարի նվազել են մինչև 12 տարվա ամենացածր ցուցանիշը, այն բանից հետո, երբ ուկրաինական անօդաչու թռչող սարքերը մի շարք հարվածներ են հասցրել՝ վնասելով առնվազն 10 խոշոր նավթավերամշակման գործարաններ։ Դրանցից մի քանիսը ամիսներ շարունակ մնացել են անգործուն։

Նույն Reuters-ի հաշվարկներով՝ Ռուսաստանում ավտոմոբիլային բենզինի արտադրությունը հունվար-մայիս ամիսներին կազմել է 18.6 միլիոն տոննա, իսկ ներքին շուկա մատակարարումները՝ 15.8 միլիոն տոննա։ Բացի այդ, հունվար-մայիսին Ռուսաստանը գրեթե մեկ քառորդով մեծացրել է բենզինի արտահանումը նավահանգիստների և սահմանային կետերի միջոցով՝ նախորդ տարվա նույն ժամանակահատվածի համեմատ, որը կազմել է 2.51 միլիոն տոննա։

Տեղեկացնենք, որ Ռուսաստանի կառավարությունը սահմանափակումներ է մտցրել բենզինի արտահանման վրա 2024 թվականի մարտի 1-ից։ Բացառություններ են եղել միջկառավարական համաձայնագրերը, այդ թվում՝ Եվրասիական տնտեսական միության անդամ պետությունների հետ, ինչպես նաև քաղաքացիների կողմից անձնական սպառման համար արտահանվող ավտոմոբիլային վառելիքի և միջազգային մարդասիրական օգնության համար նախատեսված ավտոմոբիլային բենզինի մատակարարումները։ Էմբարգոն ժամանակավորապես կասեցվել է 2024 թվականի մայիսի 20-ից մինչև հուլիսի վերջը, իսկ 2024 թվականի դեկտեմբերից միայն արտադրողներն են ստացել
ավտոմոբիլային վառելիք արտահանելու իրավունք։

Աղբյուրը՝ bpn.ge