Եվրոպական խորհրդարանն ընդունել է Վրաստանի վերաբերյալ բանաձևը՝ փոփոխություններով. 490 եվրախորհրդական քվեարկել է «կողմ», 147-ը՝ դեմ, 49-ը՝ ձեռնպահ։ Նիստին մասնակցել է ընդհանուր առմամբ 686
եվրախորհրդական։
Եվրախորհրդարանի անդամները նաև քվեարկել են երկիրը SWIFT-ից անջատելու և ոլորտային պատժամիջոցներ կիրառելու կոչի օգտին (խմբ. ֆինանսական տեղեկատվության փոխանցման և վճարումներ կատարելու միջազգային միջբանկային համակարգ, հիմնադրված 1973 թվականին։ Համահիմնադիրներն էին 19 երկրների 248 բանկ):
Խորհրդարանի կայքում հրապարակված բանաձևի նախագծում նշվում է, որ Եվրախորհրդարանը վերահաստատում է իր համերաշխությունը վրաց ժողովրդի հետ և իր անսասան աջակցությունը նրանց օրինական եվրոպական և եվրաատլանտյան ձգտումներին և բարգավաճ ու ժողովրդավարական երկրում ապրելու ցանկությանը, «ինչպես արտացոլվում է զանգվածային բողոքի ցույցերում, որոնք շարունակվում են իշխանությունների կողմից դաժան ճնշումներին չնայած»։
Փաստաթղթում ասվում է.
«Եվրոպական խորհրդարանը շարունակում է հանձնառու լինել վրաց ժողովրդին օգնելու այս նպատակներին հասնելու հարցում։ Այն խստորեն դատապարտում է խաղաղ ցուցարարների, քաղաքացիական հասարակության ներկայացուցիչների, քաղաքական ընդդիմախոսների և լրատվամիջոցների ներկայացուցիչների նկատմամբ բռնի ճնշումները, կամայական և քաղաքական դրդապատճառներով կալանավորումները՝ առանց բավարար իրավական հիմքի, և համակարգված խոշտանգումները։
Պահանջում է, որ վրացական իշխանությունները զերծ մնան ուժի կիրառումից, հարգեն հավաքների և խոսքի ազատությունը և չեղյալ հայտարարեն վերջերս ընդունված դաժան օրենսդրությունը, որն ուղղված է հանրային բողոքի ցույցերը ճնշելուն, հատուկ մտահոգություն է հայտնում քաղբանտարկյալների աճող թվի վերաբերյալ և վերահաստատում է իր կոչը՝ անհապաղ և անվերապահորեն ազատ արձակել նրանց բոլորին։
ԵՄ-ն կոչ է անում արդյունավետ և հուսալի հետաքննություններ անցկացնել բռնության բոլոր դեպքերի առթիվ։ Մտահոգություն է հայտնում դատական համակարգում անկախության բացակայության վերաբերյալ, որտեղ «Վրացական երազանքի» հետ կապված բարձրաստիճան դատավորները նախագահում են խաղաղ ցուցարարների և կառավարության քննադատների դեմ քաղաքական դրդապատճառներով դատավարությունները», — ասվում է փաստաթղթում։
Տեքստում նաև նշվում է, որ Բրյուսելը ցավում է, որ «Վրացական երազանքը» չի կարողացել օգտվել Վրաստանին որպես թեկնածու երկրի տրված պատմական հնարավորությունից՝ առաջ շարժվելու եվրոպական ինտեգրման ճանապարհով, և նշում է, որ եվրոպական ինտեգրումը շարունակում է աջակցել բնակչության ճնշող մեծամասնությունը։
Վրաստանի եվրոպական ինտեգրման գործընթացը կրկին հայտարարվել է «արդյունավետորեն կասեցված»՝ Վրաստանի շարունակական ժողովրդավարական հետընթացից և 2024 թվականի հոկտեմբերին կեղծված խորհրդարանական ընտրություններից հետո, «որոնք ներկայացնում են հստակ շրջադարձ դեպի ավտորիտար ռեժիմ, պետական ինստիտուտների և ժողովրդավարական երաշխիքների հետագա անօրինական զավթում և նոր օրենքների ընդունում»։
Եվրոպական խորհրդարանը Եվրոպայի խորհրդի 2024 թվականի հունիսի 27-ի եզրակացություններով, որ եթե «Երազանքի» գործողությունների ընթացքը չփոխվի, դա սպառնում է Վրաստանի դեպի Եվրամիություն ուղուն։
Բրյուսելը կոչ է անում «Վրացական երազանքին» վերադառնալ ժողովրդավարական բարեփոխումների և եվրաատլանտյան ինտեգրման ուղուն։
Եվրախորհրդարանը պահանջում է անհապաղ և նպատակային անձնական պատժամիջոցներ Բիձինա Իվանիշվիլիի, նրա ընտանիքի անդամների և նրա ընկերությունների դեմ, և կոչ է անում ԵՄ-ին, համագործակցելով այլ իրավասությունների, մասնավորապես՝ Միացյալ Թագավորության հետ, սառեցնել նրա ֆինանսական ակտիվները։
Ընդգծվում է, որ Վրաստանում քաղաքական ճգնաժամը կարող է լուծվել միայն նոր խորհրդարանական ընտրությունների միջոցով, «որոնք պետք է տեղի ունենան բարելավված ընտրական միջավայրում առաջիկա մի քանի ամիսների ընթացքում՝ անկախ և անաչառ ընտրական վարչակազմի հսկողության և միջազգային և անկախ տեղական դիտորդների մոնիթորինգի ներքո»։
Եվրախորհրդարանը ընդգծում է, որ չի ճանաչում «Վրացական երազանք» կուսակցության կողմից ձևավորված ինքնահռչակ կառավարությունը, որը կազմավորվել է 2024 թվականի հոկտեմբերի 26-ի կեղծված խորհրդարանական ընտրություններից հետո, և Վրաստանը համարում է «Վրացական երազանքի» անօրինական ռեժիմի կողմից գրավված պետություն»։
Շեշտվում է, որ Վրաստանն առաջընթաց չի գրանցել ԵՄ արտաքին, անվտանգության և պաշտպանական քաղաքականության առաջարկությունների իրականացման գործում, և որ Վրաստանի համապատասխանության մակարդակը ԵՄ-ի արտաքին և անվտանգության քաղաքականության (CFSP) հետ մնում է զգալիորեն ցածր և կազմում է 49%։
Միևնույն ժամանակ, Եվրախորհրդարանը հիշեցնում է, որ ԵՄ անդամակցության գործընթացում առաջընթացը պահանջում է ԵՄ ընդհանուր կանոնակարգերի լիարժեք պահպանում՝ համապատասխան բոլոր թեկնածու երկրներից առկա սպասումներին։
«Մտահոգիչ է, որ Վրաստանը չի մասնակցում ԵՄ առաքելություններին ու համատեղ անվտանգության և պաշտպանության քաղաքականության շրջանակներում ճգնաժամերը կարգավորելու համար գործողություններին. մտահոգիչ է, որ Վրաստանի արտաքին քաղաքականությանը չհետևելը հանգեցնում է ինքնամեկուսացման, իսկ «Վրացական երազանքի» բռնաճնշող ռեժիմը սրում է անկայունությունը Հարավային Կովկասում և Սևծովյան տարածաշրջանում», — ընթերցում ենք բանաձևի տեքստում։
Աղբյուրը՝ SovaNews
