Վրաստանի Ազգային բանկի տվյալներով՝ 2025 թվականի հունիսի դրությամբ Վրաստանի միջազգային արժութային պահուստներն աճել են 103.3 միլիոն ԱՄՆ դոլարով և կազմել 4.7 միլիարդ ԱՄՆ դոլար։
«Միջազգային արժութային պահուստները երկրի մակրոտնտեսական կայունության կարևոր երաշխավոր են։ Ազգային բանկի երկարաժամկետ քաղաքականությունը միշտ ուղղված է եղել միջազգային պահուստների կուտակմանը և պահուստային ակտիվների արդյունավետ կառավարմանը։ Հատկանշական է, որ ընթացիկ ժամանակահատվածում, շուկայական բարենպաստ պայմանների շնորհիվ, Ազգային բանկը շարունակում է համալրել պահուստները։ Այսպես, մարտ ամսին կատարվել են 101.7 միլիոնի, ապրիլին՝ 266.4 միլիոնի, մայիսին՝ 245.4 միլիոնի զուտ գնումներ, իսկ ընդհանուր առմամբ 2025 թվականի հունվար-մայիս ամիսների զուտ գնումները կազմել են 613.5 միլիոն։ Հունիս ամսվա զուտ գնումների վիճակագրությունը կհրապարակվի հուլիսի 25-ին», — հայտնում է Ազգային բանկը։
2025 թվականի հունիսի դրությամբ, միջազգային արժութային պահուստների ընդհանուր ծավալում ոսկու բաժինը կազմում է 16.1% (754.4 միլիոն ԱՄՆ դոլար):
«Ոսկու գնի փոփոխության արդյունքում, ձեռքբերումից ի վեր դրամական ոսկու արժեքն աճել է 254.4 միլիոն ԱՄՆ դոլարով, ինչն ընդգծում է Ազգային բանկի պահուստների դիվերսիֆիկացման ռազմավարության արդարացիությունը», — ասվում է Ազգային բանկի հայտարարության մեջ։
Վրաստանի Ազգային բանկը պաշտոնական միջազգային պահուստների վերաբերյալ թարմացված տվյալները կհրապարակի 2025 թվականի օգոստոսի 6-ին։
