Տեխասի Քեր շրջանում տեղի ունեցած ուժեղ ջրհեղեղի հետևանքով զոհվել է առնվազն 24 մարդ։ BBC-ի ռուսական ծառայությունը հաղորդում է, որ ամառային ճամբարում հանգստացող ավելի քան 20 երեխա համարվում է անհետ կորած։
Տեխասի մի քանի շրջաններում հայտարարվել է արտակարգ դրություն, շատ ճանապարհներ ավերված են, հեռախոսագծերը անջատված են։
Մինչ այժմ փրկվել կամ տարհանվել է ընդհանուր առմամբ 237 մարդ։
Փրկարարները դեռևս որոնում են մինչև 25 աղջիկների, որոնք ճամբարում էին Քերվիլի մոտակայքում, Սան Անտոնիոյից 65 մղոն հյուսիս-արևմուտք գտնվող «Քեմփ Միստիկ»-ում։
Իշխանությունները հայտնում են, որ ուղղաթիռների, անօդաչու թռչող սարքերի և նավակների միջոցով որոնողական-փրկարարական գործողությունները կշարունակվեն մինչև բոլոր անհետ կորածների գտնվելը։
Տեխասի նահանգապետ Գրեգ Աբբոտը ստորագրել է արտակարգ դրության մասին հայտարարություն, որով փրկարարներին հասանելիություն է տրվում բոլոր անհրաժեշտ ռեսուրսներին և ասել է, որ անհետ կորածների որոնումները կշարունակվեն։
Հուլիսի չորսի տոնակատարությունները չեղարկվել են ամբողջ նահանգում։
ԱՄՆ նախագահ Դոնալդ Թրամփը Տեխասում տեղի ունեցած իրադարձությունները անվանեց «ցնցող» և «սարսափելի», իսկ Սպիտակ տունը խոստացավ լրացուցիչ օգնություն նահանգին։
Ըստ իշխանությունների՝ Գվադալուպե գետը մեկ ժամից էլ պակաս ժամանակում բարձրացել է գրեթե 8 մետր, իսկ հաջորդած ջրհեղեղը քշել-տարել է շարժական տներ, մեքենաներ և տնակներ, որտեղ մարդիկ անցկացնում էին հուլիսի չորսի տոնը։
