Վրաստանում ընդդիմադիր ութ կուսակցություններ հայտարարել են ՏԻՄ ընտրություններին մասնակցելուց հրաժարվելու մասին, որից հետո Էլենե Խոշտարիան և Գեդևան Փոփխաձեն դադարեցրել են հացադուլը։ Ընդդիմադիր որոշ կուսակցությունների հայտարարությունը խորհրդարանի դիմաց հանրությանը ներկայացրել է «Դրոա»-ի ղեկավար Էլենե Խոշտարիան։
«Մենք՝ Վրաստանի արևմտամետ քաղաքական կուսակցություններն ու խմբավորումները, որոնց նպատակն է Իվանիշվիլիի ռուսական ռեժիմի լիակատար ապամոնտաժումը, Վրաստանի անկախության և ինքնիշխանության պաշտպանությունը, եվրոպական ոճի ժողովրդավարական կառավարման հաստատումը, մեր քաղաքացիների համար անվտանգ միջավայրի և արժանապատիվ կյանքի հնարավորության ստեղծումը, ինչպես նաև մեր երկրի անդամակցությունը Եվրամիությանը և ՆԱՏՕ-ին, համատեղ հայտարարում ենք.
1. Մենք հրաժարվում ենք մասնակցել այսպես կոչված տեղական ինքնակառավարման ընտրություններին, քանի որ կարծում ենք, որ ներկայիս իրականության մեջ այս գործընթացին մասնակցելը չի ծառայի մեր քաղաքացիների շահերին և միայն կստեղծի լեգիտիմության ճակատ ռուսական անօրինական ռեժիմի համար։
2. Մենք գիտակցում ենք համատեղ գործողությունների անհրաժեշտությունը և հայտարարում, որ մեր սկզբունքային, անզիջում պայքարով և աշխատանքով կանենք հնարավոր ամեն ինչ՝ ոչ ժողովրդավարական, օլիգարխիկ համակարգի վերջը արագացնելու համար։
Մենք կարծում ենք, որ հաղթանակի ճանապարհը ռեժիմի հետ լիակատար չհամագործակցելու մեջ է։ Վրաստանի քաղաքացիների հետ միասին մենք շարունակում ենք համատեղ ազգային դիմադրությունը։ Մինչև վերջ», – ասվում է հայտարարության մեջ։
Հայտարարությունը ստորագրել են հետևյալ կուսակցությունները՝ «Ազատության հրապարակ», «Եվրոպական Վրաստան», «Միացյալ ազգային շարժում», «Ռազմավարություն Աղմաշենեբելի», «Ախալի», «Գիրչի՝ ավելի շատ ազատություն», «Դրոա», «Ֆեդերալիստներ»։
