Վրացական ընդդիմության հրաժարումը ՏԻՄ ընտրություններին մասնակցելուց բանավեճեր է առաջացրել հասարակության շրջանում։ Հարցումների համաձայն, բնակչության մեծամասնությունը, թե՛ Ախալքալաքում, թե՛ ամբողջ Վրաստանում, կողմ է ընդդիմադիր ուժերի մասնակցությանը։

Վրացական ընդդիմության մի մասը հրաժարվում է մասնակցել 2025 թվականի հոկտեմբերի 4-ին նախատեսված տեղական ինքնակառավարման մարմինների ընտրություններին: Հրաժարվելու հիմնական պատճառը, ըստ քաղաքական կուսակցությունների մեծ մասի, ընտրություններին մասնակցելու իմաստի բացակայությունն է, որոնց արդյունքները, նրանց կարծիքով, կարող են կեղծվել և գտնվում են իշխանությունների լիակատար վերահսկողության տակ: Ընդդիմության կարծիքով՝ հաղթողներ կլինեն ոչ թե նրանք, ովքեր ամենաշատ ձայները կստանան, այլ նրանք, ովքեր վերահսկում են հաշվարկի գործընթացը։ Մեկ այլ պատճառ է 2024 թվականի խորհրդարանական ընտրությունների արդյունքների հետ անհամաձայնությունը, որոնք հաղթեց իշխող կուսակցությունը։ Այդ ընտրություններից հետո ընդդիմությունը հրաժարվել է խորհրդարանի աշխատանքներին մասնակցությունից։

Ընտրություններին մասնակցելու նպատակահարմարության շուրջ վեճերը պառակտել են ընդդիմությանը։ Կուսակցությունների մի մասը պատրաստ է մասնակցել, մինչդեռ մյուսը կտրականապես դեմ է։ Մինչդեռ հարց է առաջանում՝ ի՞նչ է մտածում երկրի բնակչությունն այս մասին։

Սոցիալական հետազոտությունների և վերլուծությունների ինստիտուտը (ISSA) հարցում է անցկացրել, որի արդյունքները ցույց են տվել, որ Վրաստանի բնակչության 54.5%-ը կարծում է, որ ընդդիմությունը պետք է մասնակցի 2025 թվականի աշնանը նախատեսված մունիցիպալ ընտրություններին: 22.3%-ը կարծում է, որ մասնակցությունը նպատակահարմար չէ: 23.2%-ը չի կարողացել կամ չի ցանկացել պատասխանել այս հարցին։

ISSA-ի տվյալների համաձայն՝ Թբիլիսիում և երկրի շրջաններում կարծիքները տարբերվում են։ Մայրաքաղաքում 50%-ը կողմ է ընդդիմության մասնակցությանը, իսկ մնացած 50%-ը կամ դեմ է, կամ դեռ որոշում չի կայացրել։ Շրջաններում հարցվածների 56.4%-ը նշել է, որ ընդդիմությունը պետք է մասնակցի ընտրություններին։

ISSA-ի հարցմանը մասնակցել է 2000 մարդ։ Այն անցկացվել է դեմ առ դեմ հարցազրույցների միջոցով այս տարվա մայիսի 5-ից 20-ը։

Jnews-ը նաև այլընտրանքային հարցում է անցկացրել իր բաժանորդների շրջանում Facebook և Instagram սոցիալական ցանցերում։ Հարցին, թե արդյոք ընդդիմությունը պետք է մասնակցի առաջիկա տեղական ինքնակառավարման մարմինների ընտրություններին, պատասխանել է 166 օգտատեր, մինչդեռ հարցումը տեսել է 4870 մարդ՝ 1399-ը Ֆեյսբուքում, 3471-ը՝ Instagram-ում, ինչը նշանակում է, որ հարցումը դիտողների 3%-ից մի փոքր ավելին է արտահայտել իր դիրքորոշումը։

166 հարցվածներից՝

• «Այո» պատասխանել է Instagram-ում 69 հոգի, իսկ Facebook-ում 11 հոգի (ընդհանուր 48%-ը՝ 80 մարդ)։

• «Ոչ» պատասխանել է՝ 32 օգտատերեր Instagram-ում և 7 օգտատերեր Facebook-ում (ընդհանուր 24%-ը՝ 39 մարդ):

• «Չգիտեմ» պատասխանել է՝ 43 օգտատերեր Instagram-ում և 4 օգտատերեր Facebook-ում (ընդհանուր 28%-ը՝ 47 մարդ):

Չնայած որոշ ընդդիմադիր կուսակցությունների բոյկոտին, Վրաստանի բնակչության մեծամասնությունը (ըստ ISSA-ի) աջակցում է ընդդիմության մասնակցությանը ընտրություններին։ Մարզերում այս աջակցությունն ավելի բարձր է, քան Թբիլիսիում։ Jnews-ի հարցումը, թեև պակաս ներկայացուցչական է, հաստատում է ընդհանուր միտումը. մասնակից հարցվածների մոտավորապես կեսը և դիրքորոշում ունեցողների բացարձակ մեծամասնությունը կողմ են մասնակցությանը։ Հանրային կարծիքը, ընդհանուր առմամբ, դեմ է բոյկոտին և կարծում է, որ ընտրություններին մասնակցությունը կարևոր է՝ չնայած ընտրական համակարգի նկատմամբ անվստահությանը։