«Դրամաշնորհների մասին» օրենքում նոր փոփոխությունների համաձայն՝ տեխնիկական կամ փորձագիտական օգնություն ստանալը, ինչպես նաև գիտելիքների փոխանակումը, կպահանջի Վրաստանի կառավարության համաձայնությունը: Օրինագիծը քննարկվում է արագացված կարգով:
«Առաջարկվող փոփոխություններով, ի թիվս այլ բաների, տեխնիկական կամ փորձագիտական օգնությունը, գիտելիքների փոխանակումը և այլ նմանատիպ ներդրումները նույնպես կհամարվեն դրամաշնորհներ», — ասել է օրինագծի հեղինակներից մեկը՝ «Վրացական երազանքի» ներկայացուցիչ Թորնիկե Ճեիշվիլին:
Նա նշել է, որ «դրամաշնորհներ տրամադրող սուբյեկտները նույնպես հստակեցվում են. այստեղ հստակ նշվելու է, որ ցանկացած միջազգային կազմակերպության կողմից տրամադրված ֆինանսական միջոցները կարող են համարվել դրամաշնորհներ»:
Ճեիշվիլին կարծում է, որ օրենքը պետք է խստացվի՝ «երկրի ինքնիշխանությունը պաշտպանելու» նպատակով: Նույն պատճառով, մոտ մեկ ամիս առաջ խորհրդարանը «Դրամաշնորհների մասին» օրենքում վիճահարույց փոփոխություններ մտցրեց, որոնք արգելում են կառավարության թույլտվության բացակայության դեպքում ՀԿ-ներին և ԶԼՄ-ներին դրամաշնորհներ տրամադրելը:
Փոփոխությունների արդյունքում՝
Դրամաշնորհ տրամադրելու համար անհրաժեշտ է կառավարության կամ նրա կողմից լիազորված անձի/մարմնի համաձայնությունը.
Սահմանվել է պատասխանի համար 10-օրյա ժամկետ.
Վերաքննիչ բողոքը չի կասեցնում կառավարության որոշումը։
Արգելվում է ստանալ առանց համաձայնության տրամադրված դրամաշնորհ։
Դրամաշնորհ ստացողը տուգանվում է առանց թույլտվության դրամաշնորհի համար՝ «դրամաշնորհի գումարի կրկնապատիկի չափով»։
Հիշեցնենք, որ 2025 թվականի ապրիլին Վրաստանի խորհրդարանը արագացված կարգով հաստատեց «Դրամաշնորհների մասին» և «Քաղաքացիների քաղաքական միավորումների մասին» օրենքներում փոփոխությունների փաթեթը, որոնք զգալիորեն սահմանափակում են միջազգային դոնորների և ոչ կառավարական կազմակերպությունների (ՀԿ-ների) գործունեությունը երկրում։ Նոր փոփոխությունների համաձայն՝ միջազգային դոնոր կազմակերպությունները այլևս չեն կարողանա դրամաշնորհներ հատկացնել վրացական ՀԿ-ներին առանց կառավարության նախնական համաձայնության։ Բացի այդ, նրանց արգելվում է կազմակերպել դասախոսություններ, սեմինարներ և այլ հանրային միջոցառումներ՝ քաղաքական կուսակցությունների շահերից ելնելով։
Աղբյուրը՝ bizzone.info