Մայիսի 28-ին, Ախալքալաքի մունիցիպալիտետի սակրեբուլոյում տեղի է ունեցել բոլոր հանձնաժողովների համատեղ նիստը, որտեղ քննարկվել է նոր տեսանկարահանող տեխնիկական միջոցների գնման և տեսախցիկների սերվերի սպասարկման համար ֆինանսավորում հատկացնելու հարցը։ Քննարկման ընթացքում շոշափվել են նաև բնակիչների հարցերը՝ տեսանկարահանող սարքերով արձանագրված տուգանքների վերաբերյալ։
Ախալքալաքի քաղաքապետարանը դիմել է Սակրեբուլո՝ տեսախցիկների սերվերի սպասարկման համար 17 000 լարիի և նոր տեսախցիկների ձեռքբերման համար 26 000 լարիի հատկացումը հաստատելու խնդրանքով։ Ընդհանուր գումարը կազմում է 43 000 լարի։
Քաղաքապետարանի ներկայացուցիչների խոսքերով՝ տեսախցիկները նախատեսվում է տեղադրել ոչ միայն քաղաքում, այլև գյուղերում։ Կիրականացվի նաև հնացած տեսախցիկների փոխարինում և անհրաժեշտ մալուխների ձեռքբերում։ Քաղաքապետարանի աշխատակիցների խոսքով՝ 17 000 լարին նախատեսված է մունիցիպալիտետի տարածքում երթևեկության կանոնների խախտումները գրանցող տեսախցիկների սպասարկման համար։ Նշվել է, որ այս տեսախցիկների կողմից արձանագրված տուգանքները կազմում են Ախալքալաքի մունիցիպալիտետի բյուջետային եկամուտների մի մասը։
«Անցյալ տարի տեսախցիկներով գրանցված երթևեկության կանոնների խախտումների համար տուգանքները տեղական բյուջեին բերել են մոտ 500 000 լարի», — պատգամավորներին տեղեկացրել է Ախալքալաքի քաղաքապետարանի ֆինանսական բաժնի պետ Կարեն Մերգելյանը։
Հարցրին, թե արդյո՞ք տեսահսկման սարքերն աշխատում են մշտապես, պատգամավորները պատասխանեցին, որ դրանք անընդհատ միացված չեն լինում, այլ պարբերաբար։ Դրա հետ մեկտեղ, ամեն անգամ տարբեր տեսախցիկներ արձանագրում են տարբեր խախտումներ՝ ամրագոտի չկապելը, տեխնիկական զննման բացակայությունը, արագության գերազանցումը։ Հոծ գիծը խախտելու համար տուգանքները չեն արձանագրվում տեսախցիկներով, քանի որ Ախալքալաքի և ոչ մի փողոցում գծանշումներ չկան։
Երբ մեկնաբանություն հնչեց այն մասին, որ բնակիչները մի քանի ամիս տուգանքներ չեն ստացել ճանապարհների վատ վիճակի պատճառով, Սակրեբուլոյի նախագահ Նաիրի Իրիցյանն ասաց, որ ինքը տուգանքի մասին ծանուցում է ստացել հենց նախօրեին՝ տեխնիկական զննումը չանցնելու համար։
«Երբ ճանապարհները վատ վիճակում էին, և փոսային նորոգումը չէր իրականացվել, բնակիչներն ասում էին. «Մեր մեքենաները շարքից դուրս են գալիս, ուստի մենք չենք կարող տեխնիկական զննում անցնել»։ Սակայն սա մի վարորդի կարծիքն է, մյուսները պարզապես աջակցում էին նրան։ Եթե նման օրենք ընդունվի, այն պետք է հաստատվի խորհրդարանի կողմից։ Նման բան չի կարող լինել։ Բնակիչների տուգանքների մասին ծանուցումներ չստանալու պատճառն այն է, որ տեսախցիկներն աշխատում են պարբերաբար», — պարզաբանել է Նաիրի Իրիցյանը։
Պատգամավորները նաև համաձայնեցին, որ տեսահսկման սարքերի և տուգանքների շնորհիվ վթարների թիվը նվազել է, հատկապես ճանապարհի վտանգավոր հատվածներում, ինչպիսին է Ազատություն-Աղմաշենեբելի հատվածը, որտեղ հաճախ են տեղի ունենում ՃՏՊ-ներ, այդ թվում՝ մահվան ելքով։
