Այսօր՝ մայիսի 28-ին, Ախալքալաքում գործող Line up կենտրոնում անցկացվեց Վրաստանի և Հայաստանի անկախության օրերին նվիրված միջոցառում, որի կազմակերպիչները կենտրոնի կամավորներն էին։
Միջոցառման սկզբում հնչեց երկու պետությունների պետական հիմները, եղավ պատմական ակնարկ, միջոցառման մասնակիցները ներկայացրեցին անկախության օրերին նվիրված շնորհանդես, ընդգծելով նշանավոր մարդկանց և կարևոր ամսաթվերը, արտասանեցին հայրենասիրական բանաստեղծություններ՝ երկու լեզուներով, կենտրոնի սաները հանդես եկան հայկական և վրացական ազգագրական պարերով։
Մարիաննա Սահարյանը մոտ 1 ամիս է ինչ սկսել է իր կամավորական գործունեությունը Line Up կենտրոնում և առաջին անգամ իր ընկերուհու հետ միասին կազմակերպել է այս միջոցառումը։
«Սա մեր կամավորական առաջին նախաձեռնությունն է։ Քանի որ, Հայաստանի և Վրաստանի անկախության տոները մայիս ամսին են, որոշեցինք նշել։ Միջոցառմանը պատրաստվել ենք 1-2 շաբաթ», — ասում է Մարիաննան։
Մարիաննան նշում է՝ հատուկ հրավիրված հյուրեր ունեն՝ տարբեր դպրոցներից և Երիտասարդական կենտրոնից։
Line Up-ի համահիմնադիրներից Սոնա Տոնականյանն ասում է, որ 20-ից ավելի կամավորներ ունի կենտրոնի երիտասարդական թևը և երկու երկրների անկախության տոներին նվիրված միջոցառման նախաձեռնողներն ու իրականացնողները՝ Անգելինան ու Մարիաննան են եղել։
Անկախության տոներին նվիրված միջոցառումն ավարտվեց՝ «Թող մեր անկախությունը լինի մեր հպարտության աղբյուրը» կարգախոսով։
Նշենք, որ Line Up կենտրոնը Ախալքալաքում սկսել է գործել 2022 թվականից։ Այսօր կենտրոնն ունի 250-ից ավելի աշակերտ, որոնք մեծամասամբ հայախում են պարի։ Կենտրոնում գործում է նաև թատերականի խմբակ, դհոլի, կիթառի և հարվածային գործիքների խմբակներ։
