Այսօր՝ մայիսի 26-ին, Վրաստանի Անկախության օրը, Ախալքալաքում տեղի ունեցավ մասշտաբային տոնակատարություն, որը կազմակերպվել էր Վրաստանի հաշտեցման և քաղաքացիական հավասարության հարցերով պետական նախարարի գրասենյակի կողմից՝ Ախալքալաքի մունիցիպալիտետի աջակցությամբ:
Միջոցառմանը ներկա էին խորհրդարանի անդամ Սամվել Մանուկյանը, Վրաստանի հաշտեցման և քաղաքացիական հավասարության հարցերով փոխնախարար Շոթա Ռեխվիաշվիլին, Սամցխե-Ջավախքի փոխնահանգապետ Սերգո Մուշկուդիանին և Ախալքալաքի քաղաքապետ Մելքոն Մակարյանը։ Քաղաքապետը շնորհավորեց բոլոր ներկաներին Անկախության օրվա առիթով՝ մաղթելով խաղաղություն, կայունություն և քաղաքացիական միասնություն։
«Սիրելի՛ ախալքալաքցիներ, հարգարժան հյուրեր, հարգելի ներկաներ։ Սրտանց շնորհավորում եմ ձեզ՝ Վրաստանի Անկախության օրվա, մայիսի 26-ի կապակցությամբ։ Այս տոնը մեզ հիշեցնում է վրաց ժողովրդի ազատատենչ ոգու, անկախ և ժողովրդավարական երկիր կառուցելու վճռական պայքարի մասին։ Մենք հպարտ ենք մեր պատմությամբ, երախտապարտ ենք բոլոր նրանց, ովքեր իրենց կյանքի գնով պաշտպանել են մեր հայրենիքի անկախությունը։ Ախալքալաքը, իր ազգային և մշակութային բազմազանության շնորհիվ, միշտ եղել է խաղաղության, փոխադարձ հարգանքի և խաղաղ համակեցության կենտրոն։ Մեր քաղաքը շարունակում է ակտիվորեն մասնակցել Վրաստանի զարգացման գործում։ Ես հավատում եմ, որ համատեղ աշխատելով՝ կարող ենք ապահովել մեր քաղաքի, մունիցիպալիտետի և ամբողջ երկրի բարօրությունը։ Թող այս օրը դառնա նոր ոգեշնչում առաջընթացի, կայունության և քաղաքացիական միասնության ճանապարհին։ Մաղթում եմ ձեզ բոլորիդ խաղաղություն, առողջություն և հաջողություններ», — ասաց Մելքոն Մակարյանը։
Անկախության օրն Ախալքալաքում կազմակերպվել էին տարբեր միջոցառումներ ինչպես երեխաների, այնպես էլ մեծահասակների համար։ Համերգային համարներով հանդես եկան հայտնի երաժշտական խմբեր և տեղական անսամբլներ։ Տոնակատարությունը սկսվեց փողային նվագախմբի շքերթով։
Երեխաների համար կարևորագույն իրադարձություններից մեկը ռազմական տեխնիկայի ցուցադրությունն էր։ Տեղի ունեցավ նաև տեղական ձեռնարկատերերի և քաղաքացիական կազմակերպությունների ապրանքների ցուցահանդես-վաճառք։ Կազմակերպվել էր սննդի գոտի։ Բացի այդ, կազմակերպվեց «Վրաց լեզուն մեզ միավորում է» խորագրով ցուցահանդեսը։
Երեխաների համար կազմակերպվել էին ժամանցի գոտիներ՝ հեքիաթային հերոսների մասնակցությամբ ծրագիր, դիմանկարչություն, նկարչության դասընթացներ, հսկայական շախմատ։ Երեխաները զվարճացան հսկայական բատուտի վրա, ծաղկեպսակներ հյուսեցին և մասնակցեցին օճառե պղպջակների շոուին։
Համերգային ծրագիրը ներառում էր տեղական պարային խմբերի և Թբիլիսիից ժամանած արտիստների ելույթներ։ «Մձլևարի» անսամբլը կատարեց Վրաստանի պետական օրհներգը, որի ընթացքում երկինք բաց թողնվեցին վրացական դրոշի գույներով փուչիկներ։ Տոնակատարությունը եզրափակվեց գալա համերգով, որին մասնակցեցին «Փողոցային երաժիշտներ», «Ֆորտե» անսամբլները, ինչպես նաև կատարողներ Թիկա Ջամբուրիան և Իրինա Բայրամաշվիլին։