Վրաստանի իշխանությունները մայիսի 26-ին Անկախության օրը նշելու համար կծախսեն առնվազն 5.1 միլիոն լարի (1.8 միլիոն դոլար): Այս մասին տեղեկանում ենք կառավարության որոշումից և պետական գնումների կայքում տեղադրված տեղեկատվությունից, հաղորդում է bm.ge-ն:
Պաշտպանության նախարարությունը 2,2 միլիոն լարի (մոտ 800,000 դոլար) կծախսի Թբիլիսիում և երկրի հինգ շրջաններում հանդիսավոր երդման արարողության, ինչպես նաև զինվորականների մասնակցությամբ այլ միջոցառումների համար։ Գումարը կուղղվի հետևյալին.
- Ազատության հրապարակում բեմի, մոնիտորների և ձայնային սարքավորումների տեղադրում,
- զենքի և զրահատեխնիկայի ցուցադրություններ տարբեր քաղաքներում,
- ռազմական նվագախմբի աշխատանքը,
- ուղիղ հեռուստատեսային հեռարձակումներ,
- օդային շոու,
- հրավիրատոմսերի տպագրություն։
Թբիլիսիում այլ միջոցառումների կազմակերպման համար պատասխանատու է Մշակույթի նախարարությունը։ Նրան կառավարության պահուստային ֆոնդից հատկացվել է 2.9 միլիոն լարի (ավելի քան 1 միլիոն դոլար):
Տոնական տաղավարներ կհայտնվեն Ալեքսանդրի այգում, Օրբելիանի փողոցում և հարակից տարածքում։ Այնտեղ նախատեսվում են մարզահրապարակներ, ցուցահանդեսներ և մանկական գոտիներ, ինչպես նաև վրացական գինու համտեսի գոտիներ բացել։ Օրը կավարտվի գալա-համերգով՝ վրացական փոփ աստղերի մասնակցությամբ։
Ժամը 17:10-ին՝ խորհրդանշական պահին, երբ 107 տարի առաջ Նոե Ժորդանիայի գլխավորած կառավարությունը հայտարարեց Վրաստանի անկախության մասին Ռուսական կայսրությունից, նախագահական պալատում կկայանա առանձին միջոցառում՝ Մշակույթի նախարարության հովանու ներքո։
Միջոցները կօգտագործվեն նաև գովազդային արշավի նախապատրաստման և միջոցառումների հեռուստատեսային հեռարձակման համար։
Նոր վայր և զուգահեռ հանրահավաք
Այս տարի «Վրացական երազանքը» առաջին անգամ փոխել է իր ավանդական ձևաչափը. պաշտոնական տոնակատարությունը տեղի չի ունենա Ռուսթավելիի պողոտայում։ Որոշումը կայացվել է ԵՄ անդամակցության բանակցությունների կասեցումից հետո սկսված հակակառավարական բողոքի ցույցերի ֆոնին։
Պաշտոնական միջոցառումներին զուգահեռ, նախագահ Սալոմե Զուրաբիշվիլին և ընդդիմադիր ուժերը նախատեսում են հանրահավաք անցկացնել Ռուսթավելիում։ Վարչապետ Իրակլի Կոբախիձեի խոսքով՝ սա «հասարակությունը պառակտելու» փորձ է։
