Վրաստանի նախագահ Միխեիլ Ղավելաշվիլին պաշտոնական այցով գտնվում է Հայաստանի Հանրապետությունում։ Այցի շրջանակում Երևանում Հայաստանի նախագահ Վահագն Խաչատուրյանը հյուրընկալել է Միխեիլ Ղավելաշվիլուն Նախագահական նստավայրում։

Վրաստանի նախագահի վարչակազմի տեղեկացմամբ` անձնական հանդիպման ժամանակ երկու երկրների ղեկավարները քննարկել են Վրաստանի և Հայաստանի միջև առկա ամուր բարեկամական հարաբերությունների և գործընկերության խորացման հեռանկարները։ Կողմերը քննարկել են նաև տարբեր ուղղություններով երկկողմ համագործակցության ընդլայնման հարցեր։

Վրաստանի նախագահը շնորհակալություն է հայտնել իր հայ գործընկերոջը Վրաստանի տարածքային ամբողջականության և ինքնիշխանության աջակցության համար։ Հանդիպմանը երկու երկրների նախագահները քննարկել են Վրաստանում և Հայաստանում տեղի ունեցող քաղաքական իրադարձություններն ու խոսել են տարածաշրջանային խաղաղության և կայունության կարևորության մասին։

Միխեիլ Ղավելաշվիլին նշել է, որ ոչ վաղ անցյալում Թբիլիսում կայացած Վրաստանի, Հայաստանի և Ադրբեջանի արտաքին գործերի նախարարների եռակողմ հանդիպումը ևս մեկ անգամ հստակորեն հաստատում է Վրաստանի պատրաստակամությունը՝ աջակցելու Հարավային Կովկասում երկխոսությանը, խաղաղությանը և կայունությանը։ Վրաստանի նախագահը հույս է հայտնել, որ ապագայում այս ձևաչափով երեք երկրների համագործակցությունը կշարունակվի։

Հանդիպումից հետո Վրաստանի և Հայաստանի նախագահները հանդես են եկել ԶԼՄ-ների համար համատեղ հայտարարություններով։