Այս տարի, ինչպես և ամեն տարի, Ջիվանու պուրակում էին հավաքվել ախալքալաքցիները՝ ուսանողներ, ուսուցիչներ, պետական կառույցների ներկայացուցիչներ, հոգևորականներ և շատ ուրիշներ։ Այսօր Ախալքալաքում հիշեցին 1989 թվականի ապրիլի 9-ին Վրաստանի անկախության համար զոհվածներին։
Չնայած ամպամած, անձրևոտ եղանակին, այսօր Ախալքալաքի բնակիչները ծաղիկներով մոտեցան ապրիլի 9-ի իրադարձություններին նվիրված հուշարձանին։ Միջոցառմանը, ի թիվս այլոց, մասնակցում էին Վրաստանի խորհրդարանի պատգամավոր Սամվել Մանուկյանը, Ախալքալաքի քաղաքապետ Մելքոն Մակարյանը, Սակրեբուլոյի նախագահ Նաիրի Իրիցյանը, տեղական ինքնակառավարման մարմինների և պետական այլ կառույցների աշխատակիցներ։
Հուշարձանին ծաղիկներ խոնարհեցին նաև իրավապահները, դատական համակարգի աշխատակիցները դպրոցականներն ու ուսուցիչները, ինչպես նաև մասնավոր ընկերությունների ներկայացուցիչները, ինչպիսին է SJGC-ն։ Միջոցառմանը ներկա էին նաև Հայ Առաքելական Եկեղեցու Ախալքալաքի թեմի հոգևորականներ և հայկական կազմակերպությունների ներկայացուցիչներ։ Վրաց ուղղափառ եկեղեցու Սուրբ Սինոդի անդամ, Ախալքալաքի և Կումուրդոյի թեմի միտրոպոլիտ Նիկոլոզ Փաճուաշվիլիի գլխավորությամբ քահանաները պատարագ մատուցեցին։
Պատարագից հետո Վրաց Ուղղափառ Եկեղեցու և Հայ Առաքելական Եկեղեցու հոգևորականները վրացերենից հայերեն թարգմանությամբ շնորհակալություն հայտնեցին տեղի բնակիչներին՝ իրենց քաղաքացիական գիտակցության համար, խոսեցին վրացիների և հայերի դարավոր բարեկամության, ինչպես նաև անկախության կարևորության մասին, որը ձեռք է բերվել 36 տարի առաջ այս օրը թափված արյունով։
Ելույթ ունեցավ նաեւ Սակրեբուլոյի պատգամավոր, նախկին պատգամավոր Համլետ Մովսեսյանը, իսկ մունիցիպալիտետի տարբեր դպրոցների աշակերտները պետական լեզվով այս օրվան նվիրված բանաստեղծություններ ընթերցեցին։
1989 թվականի ապրիլի 9-ի լուսադեմին, խորհրդային բանակը ցրեց խաղաղ ցույցը Թբիլիսիի կենտրոնում, ինչի հետևանքով զոհվեց 21 մարդ, հարյուրավոր քաղաքացիներ թունավորվեցին անհայտ ծագման գազից։ Վրաստանում ապրիլի 9-ը նշվում է որպես ազգային միասնության, քաղաքացիական ներդաշնակության և հանուն հայրենիքի զոհվածների հիշատակի օր։ Միևնույն ժամանակ սա Վրաստանի անկախության վերականգնման օրն է։ Ապրիլի 9-ը նաև պաշտոնապես հանգստյան օր է։
