Ախալքալաքի ավտոկայանի տարածքի սեփականատերերից մեկն արդեն պայմանագիր է ստորագրել Ախալքալաքի Սերվիս կենտրոնի հետ, որպեսզի նրանք մաքրեն տարածքը և տեղադրեն աղբարկղ: Սակայն, ավտոկայանի բարեկարգման համար ձեռնարկատերը միջոցներ չունի: Ավտոկայանի ղեկավարությունը դեռևս չի ստացել նոր կարգավորումների վերաբերյալ հրահանգները, բայց հայտարարում է, որ կպահպանի միջքաղաքային ուղևորափոխադրումների կարգավորման կանոնները:
Ինչպես նախկինում հաղորդել էր JNEWS-ը, Ախալքալաքի ավտոկայանի տարածքը բաժանված է երեք մասի, որոնցից երկուսը պատկանում են Արարատ Հովհանեսյանին (2017 թվականից), իսկ երրորդը՝ Աստղիկ Գաբրիելյանին (2023 թվականից): Աստղիկ Գաբրիելյանի և նրա մերձավորների հետ կապ հաստատել չհաջողվեց, սակայն մենք զրուցեցինք Արարատ Հովհանեսյանի հետ:
Արարատ Հովհանեսյանի խոսքով, ավտոկայանի այն հատվածը, որը գրանցված է Աստղիկ Գաբրիելյանի անունով, համընկնում է նախկին պոլիկլինիկայի շենքի տարածքի հետ և կապ չունի ավտոկայանի հետ: Իսկ 1002 քառ/մ տարածքը, որը գրանցված է Արարատ Հովհանեսյանի անունով, ծառայում է որպես ավտոկայան: Տարբեր ժամանակներում ավտոկայանը ղեկավարել են տարբեր մարդիկ և ընկերություններ: Արարատ Հովհանեսյանի խոսքով, 2025 թվականի հունվարից ավտոկայանը կառավարում է ինքը։
Արարատի խոսքով, նա արդեն պայմանագիր է կնքել Ախալքալաքի Սերվիս կենտրոնի հետ, որպեսզի նրանք մաքրեն տարածքը և տեղադրեն աղբարկղ: Սակայն տարածքի բարեկարգման և հանրային զուգարանի հարցը, ինչպես նաև նոր կարգավորումների պահպանումը, մնում է արդիական: Նրա խոսքով, անհատ ձեռնարկատերը բավարար եկամուտ չունի այս աշխատանքները կատարելու համար:
«Մենք պետք է եկամուտ ունենանք, որպեսզի բարեկարգենք տարածքն ու զուգարանը: Ես հազիվ եմ կարողանում վճարել աշխատակիցներիս աշխատավարձերը: Չգիտեմ ինչպես աշխատել, որ միջոցներ լինեն: Ինչպես գրեցիք աղբի մասին, միգուցե գրեք նաև այն մասին, որ Երևանի և այլ քաղաքների երթուղիների վարորդներն ավտոկայանից չեն մեկնում, այլ պայմանավորվում են հաճախորդների հետ ու վերցնում նրանց այլ վայրերից: Մեր միկրոավտոբուսները հաճախ կիսադատարկ են մեկնում՝ ընդամենը երկու ուղևորով: Նրանք չեն մտնում ավտոկայան, խուսափում են դրանից: Ես ուրախ կլինեմ, եթե այս հարցն էլ բարձրացնեք: Բայց ես ինչպես կարող եմ դա վերահսկել: Ես աշխատում եմ օրենքով: Այս ամենը պետք է կարգավորեն պետական մարմինները»,- ասում է Արարատ Հովհանեսյանը:
Ավտոկայանում աշխատում են երեք աշխատակից՝ երկու գանձապահ և մեկ վերահսկող: Ախալքալաքի ավտոկայանից ամեն օր երկու երթուղային տաքսի մեկնում է դեպի Թբիլիսի (մեկը՝ Ծալկայով, մյուսը՝ Խաշուրիով), մեկ ուղևորափոխադրում՝ դեպի Ախալցիխե (գնալ-գալ), իսկ ամառային սեզոնին գործարկվում է դեպի Բաթումի երթուղի:
Տնօրենի խոսքով, հանրային տրանսպորտը նույնպես խուսափում է ավտոկայանից, ոչ բոլոր միկրոավտոբուսներն են կանգնում այնտեղ: Նշենք, որ Ախալքալաքի մունիցիպալիտետում ոչ բոլոր ուղղություններով է գործում հանրային տրանսպորտը, սակայն դա այլ հարց է:
«Միկրոավտոբուսները բոլորը չեն կանգնում ավտոկայանում, նրանք կանգնում են շուկայի մոտ, կենտրոնական փողոցներում, խուսափում են ավտոկայանից, որպեսզի չվճարեն: Օրական վճարը 1 լարի է, սակայն նույնիսկ դա չեն ցանկանում վճարել»,- ասում է Արարատ Հովհանեսյանը:
Արարատ Հովհանեսյանի խոսքով, նա դեռ չի ստացել նոր կարգավորումների հրահանգը, բայց կարդացել է դրանց մասին: Սակայն եկամուտների բացակայության և մի շարք այլ հանգամանքների պատճառով նա որևէ գործողություն ձեռնարկել չի կարող:
«Ես ուրախ եմ նոր կարգավորումների համար: Այս իրավիճակում ես չեմ կարող վերահսկել վարորդներին և զբաղվել բարեկարգմամբ, սակայն այս տարի մտադիր եմ վերանորոգել ավտոկայանի հանրային զուգարանը»,- ասաց է նա:
Ավտոկայանի եկամուտը կազմում է վաճառված տոմսերի գումարի 5%-ը:
Ախալքալաքի Սերվիս կենտրոնի տնօրեն Մխիթար Ռստակյանը հաստատեց, որ պայմանագիրն արդեն ստորագրված է, և առաջիկա օրերին կսկսվի ավտոկայանի տարածքի մաքրման գործընթացը:
«Երկու-երեք օրվա ընթացքում իմ աշխատակիցները կմաքրեն ավտոկայանի տարածքը, կտեղադրենք մեկ աղբարկղ: Պայմանագրով նախատեսված է մեկ աղբարկղ, կարծում եմ, որ դա բավարար կլինի: Այնուհետև մենք կհետևենք ավտոկայանի մաքրությանը»,- ասաց Մխիթար Ռստակյանը:
Ախալքալաքի ավտոկայանի տարածքն աղբով լեցուն է
Այլևս ոչ ոք չի կարող ուղևոր տեղափոխել առանց բժշկական զննության
