---

Վրաստանի խորհրդարանը երրորդ ընթերցմամբ ընդունել է «Օտարերկրյա գործակալների գրանցման ակտը»՝ FARA օրինագիծը։ Այսօրվա լիագումար նիստում փոփոխություններին աջակցել է 86 պատգամավոր։

Քվեարկության ժամանակ խորհրդարանի նախագահ Շալվա Պապուաշվիլին նշել է, որ ընդունվել է ամերիկյան ստանդարտի և օրենքի ճշգրիտ պատճենը։

FARA-ի հետ մեկտեղ, ընդունվել են նաև փոփոխություններ Քրեական օրենսգրքում։

Ըստ ընդունված օրինագծի՝ կկարգավորվեն օտարերկրյա պատվիրատուի գործակալների գրանցման հարցերը, այդ թվում՝

• գործակալ դառնալու դիմումի ներկայացման կարգը,
• համապատասխան փաստաթղթերի հրապարակայնության ապահովումը,
• գրանցված սուբյեկտի կողմից տարեկան ֆինանսական հայտարարագրի ներկայացումը,
• գրանցման չեղարկումը և մոնիթորինգի իրականացումը՝ գործակալին բացահայտելու կամ օրենսդրությամբ սահմանված պահանջների կատարման ստուգման նպատակով։

Օտարերկրյա գործակալ գրանցվելուց խուսափելը կամ օրենքով սահմանված պահանջների չկատարվելը կհանգեցնի քրեական պատասխանատվության։ Օրենքի կատարման վերահսկողությունը կվստահվի Կոռուպցիայի դեմ պայքարի բյուրոյին։