Գիշերը՝ ապրիլի 2-ին, Ախալքալաքի Նալբանդյան փողոցում գտնվող ոսկու խանութ են մտել։ Կոտրել են մուտքի ապակե դուռը և ներս մտել։ Դեպքի առթիվ քրեական գործ է հարուցվել։
Ինչպես Jnews-ին հայտնեց ոսկու խանութի սեփականատերը՝ դեպքը տեղի է ունեցել գիշերը։ Առաջինն իրավապահներն են հասել դեպքի վայր։
«Ջարդել են մուտքի ապակե դուռը ու ներս մտել, ջարդել են ոսկու ապակե ցուցադրական դարակները, ոչինչ չեն տարել», – ասաց ոսկու խանութի սեփականատերը։
Ինչպես Jnews-ին հայտնեցին Ներքին գործերի նախարարությունից՝ սույն փաստով քրեական գործ է հարուցվել Վրաստանի քրեական օրենսգրքի 187-րդ հոդվածով, որը ենթադրում է ուրիշի գույքի ոչնչացում կամ վնասում, որը զգալի չափերի վնաս է պատճառել։ Այս հանցանքը պատժվում է տուգանքով կամ 100-180 ժամ հասարակական աշխատանքով, կամ մեկ տարի ուղղիչ աշխատանքներով, կամ ազատազրկումով՝ 1-ից 3 տարի ժամկետով։
Ինչ փուլում է գտնվում հետաքննությունը, կան արդյոք ձերբակալվածներ, Ներքին գործերի նախարարությունից դեռ չեն պարզաբանում։
