Սակրեբուլոն, ի թիվս այլ կետերի, հաստատել է Սբ. Նինոյի անվան փողոցի վրա գտնվող ճանապարհահատվածի վերականգնումը բյուջեի վերջին ճշգրտման ժամանակ: Աշխատանքների համար միջոցներն արդեն հատկացվել են, սակայն մրցույթը դեռ չի հայտարարվել։
Ջավախքի լրատվական կենտրոնի (Jnews) լրագրողները 2023 թվականի հունիսին գրել էին պայմանների մասին, որոնցում ապրում են Ախալքալաքի Սուրբ Նինո փողոցում: Փողոցի որոշակի հատված ասֆալտապատվել էր մի քանի տարի առաջ, մնացյալ մասը՝ մոտ 300 մետր, այդպես էլ սպասում էր իր հերթին։ Այս հատվածի հերթը պետք է գար 2024 թվականին,- այս մասին Jnews-ին տված հարցազրույցում ասել էր Ախալքալաքի քաղաքապետ Մելքոն Մակարյանը։
«Ինչպես քաղաքի մյուս հատվածների առնչությամբ, որոնք քիչ չեն, ինչպես ես Ձեզ արդեն ասել էի, այս տարի մենք նախագիծ ենք մշակելու, որը կներառի այս հատվածը ևս: Արդեն հաջորդ տարի փորձելու ենք փուլ առ փուլ փակել այս բոլոր խնդրահարույց հատվածները»,- նախկինում ասել էր քաղաքապետը։
Արդյունքում այս հատվածին հերթը հասել էր այս տարի՝ 2025 թվականին։ Սակրեբուլոն մարտի 27-ին հաստատել է բյուջեի փոփոխությունները, որոնց համաձայն՝ Սուրբ Նինոյի անվան փողոցի ճանապարհահատվածի վերականգնման համար տեղական բյուջեից հատկացվել է 248 398 լարի։ Նշենք, որ փողոցի այս հատվածի բնակիչները բազմիցս դիմել են տեղական իշխանություններին՝ ոչ միայն ճանապարհի ասֆալտապատման, այլ նաև այլ խնդիրների, մասնավորապես՝ բաց կոյուղու և աղբի համար։
