Ախալքալաք-Կարծախ միջպետական ավտոճանապարհի վերանորոգումը ձգձգվում է։ Տվյալ Ճանապարհի կառուցման էլեկտրոնային մրցույթը հայտարարել է Ճանապարհային վարչությունը, որը հաղթել է «Ջավախավտոգզա» ընկերությունը, սակայն պայմանագիրը դեռ չի կնքվել։ Օր-օրի ավելի ու ավելի է դժվարանում երթևեկությունը Ախալքալաք-Կարծախ ճանապարհով։
Jnews-ը բազմիցս անդրադարձել է Ախալքալաք-Կարծախ միջպետական ճանապարհի քարուքանդ վիճակին։
Ամբողջովին շարքից դուրս է եկել Ախալքալաք-Կարծախ ավտոճանապարհի Սուլդա-Ախալքալաք հատվածը։ Խորը և մեծ փոսերը ոչ միայն խանգարում են անվտանգ երթևեկությանը, այլև դանդաղեցնում են մեքենաների ընթացքը։
Ախալքալաք-Կարծախ ավտոճանապարհն ամեն տարի վերանորոգելու անհրաժեշտություն է առաջանում, քանի որ այստեղով են երթևեկում դեպի Թուրքիա գնացող բեռնատարները։
«Եթե առաջ 15 րոպե էր տևում մինչև Ախալքալաք հասնելը, հիմա արդեն մեկ ժամից ավելի է տևում։ Այս ճանապարհով երթևեկելն անհնարին է դարձել, ոչ միայն մեքենան ենք ջարդում, այլ նաև վառելիք ենք շատ ծախսում»,– ասաց Սուլդա գյուղի բնակիչ Արտյուշ Մարուքյանը։
Ախալքալաք-Կարծախ միջպետական ավտոճանապարհի վերակառուցման համար երկու մրցույթ է կայացել։ Երկուսն էլ հաղթել է «Ջավախավտոգզա» ընկերությունը: Վերանորոգման աշխատանքները կիրականացվեն հետևյալ հատվածներում՝ միջազգային ավտոճանապարհի կմ3-կմ7,8 և կմ8,8-կմ16:
Առաջին մրցույթը ընկերությունը հաղթել է 2 772 000.00 լարիով, իսկ երկրորդ մրցույթը՝ 4 488 000.00 լարիով:
Ինչպես Jnews-ը տեղեկացավ Վրաստանի ճանապարհային վարչությունից՝ էլեկտրոնային մրցույթն արդեն կայացել է, սակայն կողմերի միջև պայմանագիր դեռ չի կնքվել։
«Էլեկտրոնային մրցույթ է հայտարարված, մրցույթն ընթացքի մեջ է, որն ունի իր ժամկետները, ճշտումներ են իրականացվում։ Եթե մրցույթի հետ կապված ամեն ինչ ճիշտ լինի, ապա «Ջավախավտոգզա» ընկերության հետ պայմանագիր կկնքենք։ Ճանապարհի վիճակի մասին տեղյակ ենք, մաքսիմալ ուզում ենք, որ բոլոր հարցերեը արագ լուծենք և հաղթող ընկերության հետ համագործակցելով հնարավորինս շուտ սկսենք աշխատանքները։ Իմ կարծիքով, մինչև ապրիլ ամսվա վերջ կկնքվի պայմանագիրը», – ասաց Ճանապարհային վարչության պետի տեղակալ Պավլե Գամկղրելիձեն։
«Ջավախավտոգզա» ընկերությունից ևս հաստատեցին, որ մոտավոր 20 օրից պայմանագիրը կկնքվի, որից անմիջապես հետո կսկսեն Ախալքալաք-Կարծախ ճանապարհի վերակառուցման աշխատանքները։
Այս թեմայով՝
