Ախալքալաք-Կարծախ միջպետական ավտոճանապարհը փոսերի պատճառով դժվարանցանելի է դարձել: Ախալքալաքի քաղաքապետարանից տեղեկացնում են, որ տվյալ ճանապարհը մինչև տարեվերջ կվերակառուցվի։
2010 թվականից ի վեր, ինչ ասֆալտապատվել է ճանապարհը հիմնանորոգում միայն եղել է Վաչիան գյուղում, մնացած տեղերում միայն փոսային աշխատանքներ են իրականացվել։ Հիմա ճանապարհին մեծ փոսեր են գոյացել և դժվարանցանելի են դարձրել ճանապարհը։
Այս ճանապարհով հարյուրավոր բեռնատար մեքենաներ են անցնում Ուկրաինայում պատերազմ սկսվելուց հետո, բեռնատարների հոսքն Ախալքալաք-Կարծախ ավտոճանապարհով ավելացել է։ Մինչև բեռնատարները հասնում են սահման, անցնում են քանդված ճանապարհով, մեկը մյուսին զիջելով, հազիվ անցնում են փոսերի միջով։
Այս պայմաններում Վրաստանում աճեց նաև տարանցիկ ճանապարհի վճարը: Եթե մինչև 2022 թվականի հունիսի 20-ը տարանցիկ բեռնատարների վարորդները, կամ փոխադրող ընկերությունները վճարում էին 200 լարի, դրանից հետո սկսեցին վճարել՝ 350 լարի։
Սակայն վճարի ավելանալուն զուգահեռ, ճանապարհների վիճակն էլ ավելի վատթարացավ։
Սուլդա գյուղում եւս գլխավոր ճանապարհը գտնվում է անմխիթար վիճակում ձյունը հալվելուն պես այն ընկղմվում է ցեխի մեջ, իսկ արևոտ եղանակներին՝ փոշու։
Վաչիան գյուղում գոյացել է հսկայական փոս, մարդիկ քարեր են շարել և փայտեր են դրել, որպեսզի վարորդները տեսնեն և չընկնեն փոսը:
Ախալքալաք-Կարծախ միջպետական ավտոճանապարհի համար երկու մրցույթ է կայացել (նույն մրցույթը տարբեր լոտերով) երկուսն էլ հաղթել է «Ջավախավտոգզա» ընկերությունը: Վերանորոգման աշխատանքները կիրականացվեն հետևյալ հատվածներում. միջազգային ավտոճանապարհի կմ3+000-կմ7+800 և կմ8+800-կմ16+000:
Առաջին մրցույթը ընկերությունը հաղթել է 2 772 000.00 լարիով, երկրորդ մրցույթը՝ 4 488 000.00 լարիով: Սկզբնական գումարն առաջին լոտում եղել է 4 143 152.00 և նվազեցվել է ընկերության կողմից 1 371 152 լարիով: Երկրորդ լոտով սկզբնական գումարը եղել 7 278 560.00 լարի և նվազեցվել «Ջավախավտոգզա» ընկերության կողմից 2 790 560 լարիով:
Jnews-ը կապ հաստատեց «Ջավախավտոգզա» ընկերության հետ՝ հասկանալու համար, թե ե՞րբ են պատրաստվում սկսել ճանապարհի վերանորոգման աշխատանքները:
«Ջավախավտոգզա» ընկերությունից ասացին, որ տվյալ ճանապարհի վերակառուցման պայմանագիրը դեռ չեն կնքել, մոտավորապես երեք շաբաթից փաստաթղթերը նոր պատրաստ կլինեն:
Ախալքալաքի քաղաքապետարանի Ենթակառուցվածքների պատասխանատու Արա Մովսիսյանն այս թեմայով ասաց․
«Ախալքալաք-Կարծախ միջպետական ավտոճանապարհի մրցույթն արդեն կայացել է, որը հաղթել է «Ջավախավտոգզա» ընկերությունը: Եթե խնդիրներ չառաջանա մրցույթի հետ կապված, ապա պայմանագիր կկնքենք։ Ըստ որի՝ Ախալքալաքի սկզբից մինչև Վաչիան գյուղի սկիզբը կվերանորոգենք: Վաչիան գյուղում բաց կթողնենք, որովհետև անցած տարի ենք վերանորոգել Վաչիան գյուղի վերջնամասից նորից կշարունակենք վերանորոգումը։ Մոտավորապես մեկ ամսից պայմանագիրը կլինի, երևի մայիսից վերսկսենք վերանորոգման աշխատանքները»:
