Ախալքալաքի Աղասի Կարաբեկյանի ստոմատոլոգիական կլինիկայում արդեն մեկ տարի է գործում է պարոդոնտոլոգիայի նոր կաբինետ, որտեղ կարելի է ստանալ մասնագիտացված օգնություն լնդերի և ատամների ու այլ փափուկ հյուսվածքների բուժման գործում։ Այս կաբինետի լավ սարքավորումներով հագեցումը հնարավոր է դարձել «Քաղաքացիական հասարակության հզորացում սոցիալական, տնտեսական և քաղաքական կյանքում հավասար և լիարժեք մասնակցության համար» ծրագրի շրջանակում ստացված դրամաշնորհի շնորհիվ (“სამოქალაქო საზოგადოების გაძლიერება სოციალურ, ეკონომიკურ და პოლიტიკურ ცხოვრებაში თანაბარი და სრულყოფილი მონაწილეობისთვის”), որն իրականացնում է «Heks-Eper Georgia» կազմակերպությունը։
Աղասի Կարաբեկյանի կլինիկան Ախալքալաքի առաջին ատամնաբուժական կլինիկաներից է։ Այն գործում է 13 տարի, սակայն ինքը՝ Աղասին, այս ոլորտում աշխատում է 30 տարի։ Այսօր ատամնաբուժությունը դառել է բժշկի կենսակերպը։ Աղասիի կլինիկայում երկու բժիշկ է աշխատում՝ նա և կինը՝ Նաիրան, նաև այստեղ հաճախ աշխատում են Թբիլիսիից ժամանած խորհրդատուները։
Այս ժամանակների ընթացքում Աղասին միշտ աշխատել է իր մասնագիտական զարգացման և իր կլինիկայի զարգացման վրա: Անցած տարիների ընթացքում նա միշտ զգացել է, որ Ախալքալաքում պարոդոնտոլոգիայի կաբինետի կարիք կա, ըստ բժշկի, շրջանի բնակչության 99%-ը պարոդոնտոզ ունի։
«Երկար տարիներ այս ոլորտում աշխատելով արդեն գիտեմ, թե ինչ է պետք: Շրջանում պարոդոնտոլոգների պակաս կա, բոլորը փորձում են այս գործն անել։ Ես չգիտեմ, ուրիշներն ունեն այս սարքավորումը, թե ոչ, աշխատանքի որակը ուղղակիորեն կախված է սարքավորումների որակից, թե որ երկրի սարքավորումն ես գնում»,- ասում է Աղասի Կարաբեկյանը։
2023 թվականին Աղասի Կարաբեկյանն աշխատում էր իր կլինիկայում նոր, առանձին կաբինետ բացելու ուղղությամբ։ Տեղեկանալով Ախալքալաքում փոքր և միջին բիզնեսի զարգացման դրամաշնորհային մրցույթին մասնակցելու հնարավորության մասին, նա փոխեց իր ծրագրերը և դրամաշնորհի միջոցով շատ ավելի զարգացրեց սեփական կլինիկան, քան կարող էր անել առանց դրամաշնորհի։
«Ես կլինիկայում փոփոխություններ էի անում, ինձ առանձին կաբինետ էր պետք, ծրագրի մասին իմանալով, որոշեցի ստեղծել պարոդոնտոլոգիայի կաբինետ: Համապատասխան որակյալ տեխնիկա էր պետք, դրանք շատ թանկ են: Սարքավորման արժեքի 30%-ը ես եմ վճարել, մնացածը փակել է դրամաշնորհը: Արդեն մեկ տարի է, ինչ աշխատում ենք նոր սարքավորումով, գոհ ենք, ստացվում է, հաճախորդներ ունենք»,- ասում է նա:
Աղասի Կարաբեկյանը «Քաղաքացիական հասարակության հզորացում սոցիալական, տնտեսական և քաղաքական կյանքում հավասար և լիարժեք մասնակցության համար» ծրագրի «Աջակցություն տեղական փոքր և միջին բիզնեսին» դրամաշնորհային մրցույթի մասին տեղեկանում է սոցիալական ցանցերից։ Նա որոշում է օգտվել դրանից և նախագծային առաջարկ է գրում: Մրցույթն անցկացվել է երեք փուլով: Մարզից, ինչպես ինքն է ասում, առաջին՝ գաղափարների մրցույթին, մասնակցել է մոտ 100 շահառու։
Երկրորդ փուլում «Heks-Eper Georgia» կազմակերպությունը, շահառուների համար, բիզնես նախագիծ կազմելու, ինչպես նաև դասընթացների թեմաներում ներառված էր ձեռնարկատերերի համար կարևոր՝ ԽՀԱԱՀ-ի (DCFTA) խնդիրը։ Այս դասընթացներից հետո Աղասին և մրցույթի այլ մասնակիցներ գրել են իրենց բիզնես նախագծերը։ Երրորդ փուլը ներառում էր հաղթող բիզնես նախագծերի իրականացում։
Աղասին կարծում է, որ ժամանակակից ստոմատոլոգիայում և ընդհանրապես բժշկության մեջ չափազանց կարևոր է իմանալ և հասկանալ, թե ինչ սարքավորումներ օգտագործել:
«Բժիշկն ինքը պետք է հասկանա, թե ինչ սարքավորում է իրեն անհրաժեշտ: Մեր աշխատանքի արդյունքը մեծապես կախված է սարքավորումից, բուժառուն կարող է և դա չհասկանալ: Մարդկանց վերաբերմունքը ատամնաբուժության նկատմամբ փոխվել է, հիմա մարդիկ ավելի ուշադիր են»,- ասում է Աղասին։
Նույն ոլորտում երեք տասնամյակ աշխատելու ընթացքում Աղասին նկատել է մի օրինաչափություն, որ ատամնաբուժական հիվանդություններն երիտասարդարձել են: Եթե նախկինում սկսում էին բժշկի դիմել 13 տարեկանից, ապա այժմ երեխաների մոտ ատամնաբուժական խնդիրներ կարող են առաջանալ 6 տարեկանից։
HEKS-EPER Georgia ծրագրի այս դրամաշնորհն առաջին և միակ դրամաշնորհն է, որից օգտվել է Աղասին: Նա կարծում է, որ ցանկացած դրամաշնորհ, իհարկե, մեծապես օգնում է զարգացմանը, եթե մարդն իմանա, թե իրականում ինչի է ուզում հասնել և ինչպես։ Ի հավելումն ֆինանսական աջակցության, Աղասի Կարաբեկյանն օգտվել է վերապատրաստման ծրագրից, որը մշակվել և տրամադրվել է բիզնեսի գործունեությունը բարելավելու համար, ինչպես նաև անհատական խորհրդատվությունների շարքից, մասնավորապես մարքեթինգ, վաճառքի կառավարում փոքր և միջին բիզնեսի համար, սոցիալական մեդիա բիզնեսի զարգացման համար, ֆինանսական հաշվառում և հաշվետվություններ:
«Եթե դիմում ես դրամաշնորհի համար, պետք է հստակ իմանաս, թե ինչ ես ուզում, եթե գիտես քո գործը և գիտես, թե ինչի վրա ես ծախսելու և ինչ ես անելու»,- հավելում է ատամնաբույժը։
Ախալքալաքում ատամնաբույժների պակաս չի զգացվում: Մունիցիպալիտետում աշխատում է մոտ 60 ատամնաբույժ։ Աղասին լավ է վերաբերվում մրցակիցներին և ասում, որ նրանց միջև առողջ մրցակցություն կա։ «Եթե հետևես երկու սկզբունքի՝ աշխատանքի որակ և գին, ապա պետք չէ վախենալ մրցակցությունից»։
Ատամնաբույժն ասում է, որ եթե նորից լինի հարմար հնարավորություն Եվրոմիության կամ այլ դոնորների դրամաշնորհային մրցույթի մասնակցելու ինքն անպայման կփորձի մասնակցել, մանավանդ որ արդեն ունի փորձ և գիտելիք:
