Վրաստանի խորհրդարանում, որն ամբողջությամբ վերահսկվում է «Վրացական երազանքի» կողմից, սկսել են խոսել սոցիալական ցանցերում եւս վերահսկողություն մտցնելու անհրաժեշտության մասին։
Գաղափարը հնչեցրել է «Ազատություն» ռադիոկայանի նախկին լրագրող, հանրային պաշտպան, իսկ այժմ իշխող կուսակցությանը կից քաղաքական «Ժողովրդի ուժի» խմբավորման առաջնորդներից մեկը՝ Սոզար Սուբարին։
Սուբարիի խոսքով, այս հարցի վրա պետք է աշխատանք սկսել՝ «մարդկային արժանապատվությունը պաշտպանելու և վիրավորանքները պատժելու համար»։
«Այսօր սոցցանցերում տարածված տեղեկատվությունը կարող է շատ ավելի մեծ ազդեցություն ունենալ հանրային կարծիքի վրա, քան հեռուստատեսությունը կամ ռադիոն… Սոցիալական ցանցերն այսօր ունեն ամենամեծ լսարանը և ամենամեծ ազդեցությունը, և շատ լավ կլիներ, եթե մենք սկսեինք աշխատել այս ոլորտում կանոնակարգման վրա, որպեսզի պաշտպանված լինեն մարդու արժանապատվությունն ու անձնական կյանքը, իսկ վիրավորանքները՝ պատժվեն»,- ասել է Սուբարին։
Թե ինչպես է լինելու այս ամենը, առայժմ մանրամասները չկան։
Այս շաբաթ խորհրդարանում խոսվում էր առցանց լրատվամիջոցների համար եւս կանոնակարգ մտցնելու անհրաժեշտության մասին։
«Վրացական երազանքի» կողմից «Հեռարձակման մասին» օրենքում կատարված փոփոխություններն այս փուլում չեն ազդում առցանց լրատվամիջոցների վրա։ Այս մասին հայտարարել է իրավական հարցերով խորհրդարանական հանձնաժողովի ղեկավար Արչիլ Գորդուլաձեն։ Նա ասաց, որ «Վրացական երազանքը» կշարունակի աշխատել «այս կարևոր հարցի կարգավորման ուղղությամբ ևս»։
Newsgeorgia
