Ըստ Freedom House-ի 2025 թվականի համաշխարհային զեկույցի, որը հրապարակվել է փետրվարի 26-ին, Վրաստանը շարունակում է մնալ «մասամբ ազատ» կատեգորիայում՝ 100-ից 55 միավորով, ինչը երեք կետով պակաս է նախորդ տարվա համեմատ։
Տարածված տեղեկատվության համաձայն՝ Վրաստանը 100 հնարավորից ստացել է 55 միավոր։ Քաղաքական իրավունքների առումով Վրաստանի միավորը 40 հնարավորից 21-ն է, իսկ քաղաքացիական իրավունքների մասով՝ 60 հնարավորից 34։
2024 թվականին Վրաստանի վարկանիշը 58 միավոր էր։ Անցյալ տարի Վրաստանը հավաքել է 22 միավոր քաղաքական իրավունքների, իսկ 36 միավոր՝ քաղաքացիական իրավունքների ոլորտում։
Հրապարակված զեկույցում Վրաստանը հիշատակվում է մեկ անգամ, որտեղ ասվում է, որ «ընտրական բողոքի ակցիաների ընթացքում բռնության աճը տարածված է և նկատվել է 11 երկրներում, այդ թվում՝ Վրաստանում և Մոզամբիկում, որտեղ անվտանգության ուժերն անհամաչափ ուժ են կիրառել ցուցարարների նկատմամբ»։
Վրաստանի վերաբերյալ մանրամասն զեկույց այս փուլում կայքում հասանելի չէ ։
Ինչ վերաբերում է այլ երկրներին, ապա 2025 թվականին Հայաստանի վարկանիշը կազմել է 54 միավոր, Ադրբեջանինը՝ 7, Բելառուսինը՝ 7, Թուրքիայինը՝ 33, Ուկրաինայինը՝ 51, իսկ Ռուսաստանինը՝ 12։
Freedom House-ի զեկույցն ընդհանուր առմամբ ներառում է 195 երկիր և 13 տարածք, որոնք գնահատվում են 25 ցուցանիշներով։
Ամենաազատը Ֆինլանդիան է, որն ունի 100 միավոր։ Նորվեգիան, Շվեդիան և Նոր Զելանդիան ունեն 99-ական միավոր։
Freedom House-ի տվյալներով՝ աշխարհում ազատության ընդհանուր մակարդակը նվազում է արդեն 19-րդ տարին անընդմեջ։ Վերջին մեկ տարվա ընթացքում իրավիճակը վատթարացել է վաթսուն և բարելավվել 34 երկրներում: Ներկայումս մարդկության 20%-ն ապրում է ազատ երկրներում, իսկ 40%-ը՝ մասամբ ազատ և ոչ ազատ երկրներում։
