Վրաստանի խորհրդարանի փոխխոսնակ Թեա Ծուլուկիանին սպառնացել է բանտով՝ «Վրացական երազանքի» կողմից ստեղծված խորհրդարանական հանձնաժողովի հետ համագործակցելուց հրաժարվելու համար՝ իշխանության տարիներին «Միացյալ ազգային շարժման» գործունեությունը հետաքննելու համար։
«Այս հանձնաժողովի պահանջները չկատարելը խստագույնս պատժվում է։ Եթե դուք չկատարեք մեր պահանջը, այն է՝ փաստաթուղթ չտրամադրեք կամ չներկայանաք, այս արարքը հետապնդվում է քրեական օրենսդրությամբ։ Այստեղ նախատեսված են պատժամիջոցներ՝ տուգանքներ կամ նույնիսկ ազատազրկում», – «Իմեդի» հեռուստաալիքին տված հարցազրույցում հայտարարել է հանձնաժողովը ղեկավարող Ծուլուկիանին։
Նրա խոսքերը հնչեցին ընդամենը ժամեր անց, երբ ընդդիմությունը պաշտոնապես հրաժարվեց որևէ ձևով համագործակցել հանձնաժողովի հետ: «ՄԱՇ» առաջնորդ Թինա Բոկուչավան հանձնաժողովի նպատակն անվանել է Վրաստանի նորագույն պատմության «վերաշարադրումը»՝ ելնելով Ռուսաստանի շահերից: Միաժամանակ նա ընդգծել է, որ ընդդիմությունը լիովին գիտակցում է ռիսկերը, այդ թվում՝ ցուցմունք տալուց հրաժարվելու համար հնարավոր պատիժը։
Հունվարի 9-ին «Վրացական երազանք»-ը հայտարարել էր Միխեիլ Սաակաշվիլիի «ռեժիմի հանցագործությունները» 2003-2012 թվականներին ուսումնասիրող հանձնաժողովի ստեղծման մասին։ Նրա աշխատանքը կենտրոնացած է մի քանի հիմնական ուղղությունների վրա.
Հանձնաժողովը կաշխատի երեք ամիս՝ ևս երեքով երկարաձգելու հնարավորությամբ։ Քննության արդյունքներով եզրակացությունները կուղարկվեն դատախազություն՝ քրեական գործ հարուցելու նպատակով։
Նախորդ իշխանության ներկայացուցիչների համար «վրացական Նյուրնբերգ» կազմակերպելու խոստումը դարձավ «Վրացական երազանքի» նախընտրական քարոզարշավի առանցքային կետերից մեկը։ Կուսակցությունը չի բացառել նաև «ՄԱՇ»-ի ու նրա հետ կապված այլ քաղաքական ուժերի արգելքը։ Ընդդիմությունն իր հերթին մեղադրում է «Վրացական երազանքին» և նրա հիմնադիր Բիձինա Իվանիշվիլիին ռեպրեսիաներ նախապատրաստելու և երկրում այլակարծությունը վերացնելու ձգտումների մեջ։
Նյութը՝ «Новости Грузия»-ից
