Այսօր՝ փետրվարի 19-ին, Ախալքալաք-Նինոծմինդա ճանապարհին տեղի է ունեցել ՃՏՊ, բախվել են երկու ավտոմեքենաներ, ինչի արդյունքում հրդեհ է բռնկվել։
«Ռադիո Նոր»-ի փոխանցմամբ՝ դեպքի վայրում աշխատում էին իրավապահ մարմինները, ինչպես նաև Ախալքալաքից շտապօգնության մեքենան և հրշեջ մեքենան։ Վթարից տուժածները տեղափոխվել են Ախալքալաքի հիվանդանոց։
Ըստ Jnews-ի՝ վթարի հետևանքով երկու մարդ վիրավորվել է, երկուսն էլ Ախալքալաքի հիվանդանոցի բժիշկների հսկողության տակ են։ Թեթև վնասվածքներ են ստացել։
Ինչպես Jnews-ին հայտնեցին Վրաստանի ՆԳՆ-ից, վթարի փաստով գործ է հարուցվել ՔՕ 276-րդ հոդվածի 2-րդ մասով՝ «կամ ավտոմեքենայի, տրամվայի, տրոլեյբուսի, տրակտորի կամ այլ մեխանիկական տրանսպորտային միջոցը վարող անձի կողմից երթևեկության անվտանգության կանոնները խախտելը, ինչի հետևանքով առողջությանը պատճառվել է ավելի քիչ լուրջ վնաս»։
Պատժվում է տուգանքով կամ տնային կալանքով՝ վեց ամսից երկու տարի ժամկետով, կամ ազատազրկմամբ՝ առավելագույնը երեք տարի ժամկետով, պաշտոն զբաղեցնելու կամ գործունեությամբ զբաղվելու իրավունքից զրկելով՝ առավելագույնը երեք տարի ժամկետով կամ առանց դրա։
Ըստ Jnews-ի՝ սա Ախալքալաքում այսօր արդեն երկրորդ ճանապարհատրանսպորտային պատահարն է։ Ավելի վաղ կողաշրջվել էր նաև բեռնատար, վարորդը Ախալքալաքի հիվանդանոցում ծանր վիճակում է:
