Օրերս ավարտվել է Ախալքալաքի թիվ 5 հանրային դպրոցի տարածքում վթարային շենքերի քանդման աշխատանքները։ Քաղաքապետարանի տվյալներով՝ այս վայրում մեծ զբոսայգի կառուցելու ծրագրեր կան։

Շենքերի ապամոնտաժման համար Ախալքալաքի քաղաքապետարանը հատկացրել է 285 171 լարի, իսկ մրցույթում ամենացածր գինն առաջարկել է «Ինտեր» ՍՊԸ-ն, սակայն պայմանագիրը կնքվել է «Գոլդ» ՍՊԸ-ի հետ՝ 168 999,31 լարիով։

Ախալքալաքի մունիցիպալիտետի քաղաքապետարանի ենթակառուցվածքների, ճարտարապետության և շինարարության ծառայության պետ Արա Մովսիսյանի խոսքով, ապամոնտաժված շենքերի տեղում զբոսայգի է կառուցվելու, սակայն դրա համար ֆինանսավորում դեռ չի հատկացվել և նախագիծը կազմված չէ։

Jnews-ը ևս գրել է, որ շենքերը վտանգավոր են և անհրաժեշտ է դրանք ապամոնտաժել, քանի որ վթարային շենքերը տեղակայված են եղել դպրոցի տարածքում, և դրանց մոտ հաճախ խաղացել են դպրոցականներն ու հարևան փողոցների երեխաները։ Եռահարկ շենքից տեղ-տեղ մնացել է չորս պատ, տեղ-տեղ՝ մեկ։ Տանիք չկա։ Սա Ախալքալաքի ֆիզիկամաթեմատիկական գիշերօթիկի նախկին հանրակացարանի շենքն է։ Մոտակայքում է գտնվում նաև ճաշարանի շենքը՝ նույն վիճակում, իսկ ավելի հեռու՝ մեկ հարկանի լվացքատան շենքը։ Այս ամենը ներառված է Ախալքալաքի թիվ 5 դպրոցի ընդարձակ տարածքում։ Ախալքալաքի բնակիչներն այս վայրը հիշելով անվանում են գիշերօթիկ դպրոց։ Նախքան ԽՍՀՄ փլուզումը ֆիզիկամաթեմատիկական թեքումով այս դպրոցում սովորելը հեղինակավոր էր համարվում: Այն ԽՍՀՄ-ի փլուզվելով և վերափոխվելով սովորական դպրոցի փլուզվեց նաև անշարժ գույքը՝ հանրակացարանը, ճաշարանը և լվացքատունը։

Դպրոցի ուսուցիչները մի քանի անգամ նամակով դիմել են պետությանը՝ խնդրանքով դպրոցի հաշվեկշռից հանել երեխաների համար վտանգավոր շենքեր ներառող տարածքը։ Ուսուցիչները և ախալքալաքցիները վախենում էին, որ մի օր այս պատերը կփլվեն և մարդիկ կմնան փլատակներում, քանի որ դպրոցի շրջակայքում բնակելի փողոցներ կան, իսկ երեկոյան ժամերին հարևան փողոցների երեխաները դպրոցի տարածքում են, բնակիչները քայլում են։ Վտանգավոր շենքերը ոչ մի կերպ չեն ցանկապատվել։