Մյունխենի համաժողովից այսօր՝ փետրվարի 18-ին, Թբիլիսի վերադարձած Վրաստանի հինգերորդ նախագահ Սալոմե Զուրաբիշվիլիի վրա անհայտ անձինք օդանավակայանում ձվեր են նետել, հաղորդում է «Ազատության» վրացական ծառայությունը։
Նախօրեին Թբիլիսիի օդանավակայանում ձվերով հարձակման էր ենթարկվել նաև «Գախարիան հանուն Վրաստանի» ընդդիմադիր կուսակցության առաջնորդ Գեորգի Գախարիան։
Հավաքվածներն, ըստ հաղոդրագրության, վիրավորական վանկարկումներ են հնչեցրել Գախարիայի հասցեին՝ «դավաճան», « USAID-ի ֆինանսավորումը վերջացել է, հիմա էլ ԵՄ-ի՞ց ես օգնություն խնդրում»։ Քաղաքական ուժը պնդում է, որ օդանավակայանում գտնվող ոստիկանները չեն միջամտել տեղի ունեցածին։ Գախարիան ևս վերադառնում էր Մյունխենից, որտեղ մասնակցում էր Անվտանգության միջազգային համաժողովին։
Զուրաբիշվիլիի գրասենյակը դեռ չի արձագանքել միջադեպին։
