Առողջապահության ոլորտի բարեփոխումների շրջանակում, Ախալքալաքի մունիցիպալիտետի բոլոր գյուղական ամբուլատորիաներն աստիճանաբար փոխանցվում են «Վրաստանի բժշկական հոլդինգին»։ Հոլդինգը գործում է ավելի քան 2 տարի, Ախալքալաքի մունիցիպալիտետից նրան է փոխանցվել 17 ամբուլատորիա կամ հողատարածք՝ ամբուլատորիաներ կառուցելու նպատակով, որոնցից, մեր տեղեկություններով, այս ձմռանը գործել է միայն մեկ գյուղի բուժամբուլատորիա։
Ընթացիկ տվյալներով, «Վրաստանի բժշկական հոլդինգին» փոխանցվել է 17 ամբուլատորիա կամ տարածք հետևյալ գյուղերում՝ Մաջադիա, Դիլիսկա, Զակ, Ղադոլար, Արագվա, Տուրցխ, Բարալեթ, Գոգաշեն, Ալաստան, Կարտիկամ, Ալաթուման, Կումուրդո, Մեծ Խորենիա, Սուլդա, Էխտիլա, Կարծախ, Կուլիկամ։ Եթե գյուղում ամբուլատորիա չկա, ապա ընտրվում և փոխանցվում է հողատարածք ամբուլատորիայի կառուցման համար։
Կուլիկամ գյուղում Ախալքալաքի մունիցիպալիտետը մի քանի տարի առաջ հողատարածք էր հատկացրել ամբուլատորիայի կառուցման համար, սակայն շինարարությունն այդպես էլ չի սկսվել։ Այն բանից հետո, երբ սկսվել է ամբուլատորիաների «Վրաստանի բժշկական հոլդինգին» փոխանցելու գործընթացը, 2023 թվականի հոկտեմբերին, ընկերության ներկայացուցիչները, տեղանքը գնահատելու նպատակով գյուղ են այցելել։ Սակայն գնահատումից հետո, նրա փոքրության պատճառով, Հոլդինգը հրաժարվել է ընդունել այդ հողամասը:
Կարծախ գյուղում շինություն չկար, Հոլդինգին հողատարածք էին հատկացրել շինարարության համար: Մեր տեղեկություններով, Կարծախ գյուղում նույնպես հողամասը չեն ընդունել, սակայն, ըստ գյուղում քաղաքապետի լիազոր Գաբրիել Կարապետյանի, նման բան չի եղել, և Հոլդինգը Կարծախ գյուղում այս տարի ամբուլատորիա է կառուցելու։
Երկու տարուց ավելի է, ինչ ամբուլատորիաները փոխանցվել են Հոլդինգին, գործընթացը շարունակվում է, սակայն դրանց աշխատանքները տեղում դեռ տեսանելի չեն։ Անցյալ տարի «Վրաստանի բժշկական հոլդինգ» ընկերությունը վերանորոգել է միայն Դիլիսկա գյուղի ամբուլատորիան։ Ախալքալաքի մունիցիպալիտետում գործում է ընդամենը 21 ամբուլատորիա, որոնցից 17-ն արդեն փոխանցվել է։
Ախալքալաքի ՀԱԿ տնօրեն Սիրանուշ Տոնականյանի խոսքով, ամբուլատորիաներից աշխատում է միայն Դիլիսկա գյուղի ամբուլատորիան, մնացածները չեն աշխատում մշտական հիմունքներով, իսկ բուժքույրերն իրենց աշխատանքները տանից են կատարում։
Jnews-ը հարցում է պատրաստում «Վրաստանի բժշկական հոլդինգի», որպեսզի մանրամասն իմանա, ոթե ինչ է արել Հոլդինգն Ախալքալաքում, ինչու չեն աշխատում ամբուլատորիաները կամ ինչպես են դրանք աշխատում, ինչպես նաև կազմակերպության, մունիցիպալիտետում կատարվելիք հետագա աշխատանքների մասին ու տեղեկացնի իր ընթերցողներին։
