Այսօր և վաղը՝ փետրվարի 18-ին և 19-ին, սպասվում են մի շարք հանդիպումներ՝ ուղղված ռուս-ուկրաինական հակամարտության կարգավորմանը։
Ուկրաինայի նախագահ Վլադիմիր Զելենսկին այսօր Անկարայում կհանդիպի Թուրքիայի նախագահ Ռեջեփ Թայիփ Էրդողանի հետ, հայտնում է France 24-ը՝ հղում անելով Թուրքիայի նախագահի հաղորդակցության գծով տնօրեն Ֆահրեթին Ալթունին։
«Հանդիպման ընթացքում կքննարկվեն ռազմավարական գործընկերության բոլոր ասպեկտները, Ուկրաինայի վերջին իրադարձությունները, ինչպես նաև տարածաշրջանային և գլոբալ այլ հարցեր»,- գրում է Թուրքիայի նախագահի հաղորդակցության գծով տնօրենը X սոցիալական ցանցում։
Այսօր՝ փետրվարի 18-ին, Սաուդյան Արաբիայում ԱՄՆ պետքարտուղար Մարկո Ռուբիոն բանակցություններ կվարի ՌԴ ԱԳ նախարար Սերգեյ Լավրովի հետ՝ ուկրաինական պատերազմի ավարտի շուրջ։
Դրանից հետո՝ փետրվարի 19-ին՝ ԱՄՆ-ի և Ռուսաստանի պաշտոնյաների հանդիպումից մեկ օր անց, Ուկրաինայի նախագահը կայցելի Սաուդյան Արաբիա։
Մեծ Բրիտանիայի վարչապետ Քիր Սթարմերը փետրվարի 17-ին Փարիզում Ուկրաինայի հարցով արտակարգ գագաթնաժողովից հետո ասել է, որ հաջորդ շաբաթ կմեկնի Միացյալ Նահանգներ՝ ԱՄՆ նախագահ Դոնալդ Թրամփի հետ քննարկելու «երկարաժամկետ խաղաղության հիմնական տարրերը»,- հայտնում է BBC-ի ռուսական ծառայությունը։
Ըստ Սթարմերի խոսքերի՝ առաջիկա օրերին նա կխոսի Ուկրաինայի նախագահ Վլադիմիր Զելենսկու հետ, իսկ հետո եվրոպացի առաջնորդները նախատեսում են նոր հանդիպում անցկացնել։
