Կոռուպցիայի ընկալման ինդեքսում Վրաստանը պահպանել է 2015 թվականից ի վեր ամենացածր միավորը։ Transparency International-ի (TI) կողմից հրապարակված 2024 թվականի վարկանիշի համաձայն՝ Վրաստանը 100 հնարավորից ստացել է 53 միավոր (նույնը, ինչ 2023 թվականին)։ Կազմակերպությունը նշում է, որ այս արդյունքը ցույց է տալիս, որ մանր կաշառակերությունը Վրաստանում տարածված չէ, սակայն կոնկրետ բարեփոխումներ չեն իրականացվել, որոնք կարող են առաջընթաց համարվել կոռուպցիայի դեմ պայքարում։
Սակայն, ինչպես գրում է TI-ն, Վրաստանը շարունակում է մնալ Արևելյան Եվրոպայի և Կենտրոնական Ասիայի տարածաշրջանի առաջատար երկրներից մեկը մանր կոռուպցիայի վերացման հարցում։ Այնուամենայնիվ, կազմակերպությունն ընդգծում է, որ ինդեքսը չի չափում կոռուպցիայի այնպիսի բարդ ձևեր, ինչպիսիք են պետության գրավումը և կլեպտոկրատիան:
«Ակնհայտ է, որ ժողովրդական մակարդակում կոռուպցիայի բացակայությունը չի նշանակում, որ երկրում ժողովրդավարության բարձր մակարդակ կա, և որ բոլոր ինստիտուտները ճիշտ են գործում: Ավելին, մանր կաշառքի վերադարձը լիովին հնարավոր է, քանի դեռ համակարգային բարեփոխումներ չեն իրականացվել հակակոռուպցիոն համակարգ և անկախ ինստիտուտներ կառուցելու, ինչպես նաև քաղաքացիական հասարակության և լրատվամիջոցների համար բարենպաստ միջավայր ստեղծելու համար»,- ասվում է TI-ի զեկույցում։
Կազմակերպությունը նաև պնդում է, որ վրացական իշխանությունները բազմիցս և անարդարացիորեն օգտագործել են արդյունքները իրենց օգտին.
«Որոշ կառավարություններ սխալ են օգտագործել արդյունքները՝ աղավաղված պատկեր ստեղծելու համար։ Օրինակ, Վրաստանում կառավարությունը 2012 թվականից ի վեր չի կարողացել բարելավել իր Կոռուպցիայի ընկալման ինդեքսոի գնահատականը, սակայն շարունակում է այս արդյունքը ներկայացնել որպես հիմնական ձեռքբերում՝ թաքցնելու իր լուրջ հարձակումները ժողովրդավարական գործընթացների, օրենքի գերակայության և քաղաքացիական ազատությունների վրա: Նախորդ տարիներին «Թրանսփարենսի Ինթերնեշնլ»-ն այս Ինդեքսի վերլուծության մեջ նշել է, որ Վրաստանում կոռուպցիայի առումով հիմնական խնդիրներն են պետության գրավումը և կլեպտոկրատական գործելակերպի աճը»:
Կոռուպցիայի ընկալման ինդեքսն ավանդաբար անցկացվում է 180 երկրներում։ Երկրները գնահատվում են 100 բալանոց սանդղակով, որտեղ 100-ը դրական արդյունք է, իսկ 0-ն՝ բացասական:
