Վրաստանում տեղական ինքնակառավարման մարմինների ընտրությունները տեղի կունենան 2025 թվականի հոկտեմբերի 4-ին։ Սակայն խորհրդարանական ընտրություններից հետո շարունակվող բողոքի ակցիաների ֆոնին հայտնի չէ, թե ինչպես կանցկացվեն նոր ընտրությունները, և արդյո՞ք Վրաստանը պատրաստ է դրանց։
Հոկտեմբերի 26-ից ի վեր Վրաստանում բողոքի ցույցերը չեն հանդարտվում. բնակչության մի մասը մերժում է ընտրությունների արդյունքները և պահանջում վերանայել դրանք, նույն բանին է ձգտում նաև ընդդիմությունը։
Քաղաքագետների կարծիքով՝ ստեղծված քաղաքական իրավիճակում հարցականի տակ է մնում այս տարվա հոկտեմբերի 4-ին նշանակված ՏԻՄ ընտրությունների անցկացումը։
«Ընտրություններ չեն լինի: Եթե համապետական ընտրություններում պատրաստ էին բացահայտ գողանալ մանդատները, ապա տեղական մակարդակում իրավիճակն ավելի վատ կլինի. սա նույնիսկ ընտրությունների իմիտացիա չէ, այլ պարզապես թատրոն։ Մի խոսքով, ՏԻՄ ընտրություններ չեն լինի։ Ես կարծում եմ, որ ընդդիմությունը չպետք է մասնակցի ընտրություններին, որոնք նախապես հայտնի են, որ անարդար են և անազատ։ Բայց ես չգիտեմ, թե ինչ կանեն կուսակցությունները, որոնք որոշում են մասնակցել դրանց, իրականում դա կնշանակի նրանց համագործակցությունը ռեժիմի հետ»,- ասում է Ռոնդելի հիմնադրամի քաղաքագետ Գիորգի Բադրիձեն:
Հիշեցնենք, որ Վրաստանի 11-րդ գումարման խորհրդարանի առաջին նիստը նշանակված էր նոյեմբերի 25-ին, թեև, ըստ Սահմանադրության, այն պետք է հրավիրեր երկրի նախագահը, սակայն Սալոմե Զուրաբիշվիլին, չճանաչելով ընտրությունների արդյունքները, դա չարեց։ Նա և չորս ընդդիմադիր կուսակցությունները, որոնք հաղթահարել են 2024 թվականի խորհրդարանական ընտրությունների ընտրական շեմը, հայտարարել են, որ հոկտեմբերի 26-ի ընտրությունների արդյունքները կեղծված են։
Նիստին մասնակցել են միայն իշխող «Վրացական երազանք» կուսակցության պատգամավորները, որը, ըստ ԿԸՀ-ի, հոկտեմբերի 26-ի ընտրություններում հավաքել է ձայների մոտ 54%-ը և ստացել խորհրդարանի 150 մանդատներից 89-ը։ Նրանք ճանաչել են բոլոր 150 պատգամավորների լիազորությունները, խորհրդարանի խոսնակի պաշտոնում վերընտրել են Շալվա Պապուաշվիլիին և նշանակել են հանձնաժողովների նախագահներին։ Երկրի պատմության մեջ առաջին անգամ նախագահն ընտրվել է ոչ թե ժողովրդի քվեարկությամբ, այլ ընտրական կոլեգիայի կողմից, որի կազմում ընդգրկված են խորհրդարանի անդամներ, ինչպես նաև Աբխազիայի և Աջարիայի տեղական իշխանությունների ներկայացուցիչներ։ Այս պաշտոնում նշանակվել է Միխեիլ Կավելաշվիլին։ «Վրացական երազանք»-ի հաջորդ քայլը հոկտեմբերի 26-ին ընտրված 49 ընդդիմադիր պատգամավորներին պատգամավորական մանդատներից և պատգամավորական անձեռնմխելիությունից զրկելն էր։