Վրաստանի խորհրդարանը աջակցել է 2003-2012 թվականներին գործող կառավարության և քաղաքական գործիչների գործունեությունը հետաքննող ժամանակավոր խորհրդարանական հանձնաժողովի ստեղծմանը։
Լիագումար նիստում քվեարկության է դրվել «Վրաստանի խորհրդարանի 2003-2012 թվականներին գործող ռեժիմի և նրա քաղաքական գործիչների գործունեությունը հետաքննող ժամանակավոր քննչական հանձնաժողով ստեղծելու մասին» որոշման նախագիծը։ Հանձնաժողովի ստեղծմանը կողմ է քվեարկել 83 պատգամավոր, եւ ոչ ոք դեմ չի արտահայտվել։
Ըստ կանոնակարգի՝ հանձնաժողովի անդամների կեսը պետք է ընդդիմադիր պատգամավորներ լինեն։ Խորհրդարանական ընդդիմությանը վերապահված տեղերը կզբաղեցնեն մեծամասնությունից տարանջատված «Ժողովրդի ուժը» կուսակցության ներկայացուցիչները։
Առաջին փուլում հանձնաժողովը խորհրդարանում կաշխատի երեք ամիս և կնախապատրաստի «Ազգային շարժման» կառավարման շրջանի քաղաքական և իրավական գնահատականը։
Իշխող թիմն ասում է, որ «2003-2012 թվականների ռեժիմի գնահատումը վճռորոշ է երկրին սպառնացող վտանգները կանխելու և Վրաստանում առողջ քաղաքական համակարգ ստեղծելու համար»։
Ինչպես նախաձեռնությունը ներկայացնելիս հայտարարել է խորհրդարանական մեծամասնության առաջնորդ Մամուկա Մդինարաձեն, «Ժամանակավոր քննչական հանձնաժողովը կկանչի և կհարցաքննի ռեժիմի պաշտոնյաներին, ինչպես նաև ցանկացած այլ անձանց, ովքեր կարող են մեղադրվել ռեժիմի կողմից կատարված հանցագործությունների մեջ, կամ ովքեր կարող են արժեքավոր տեղեկություններ ունենալ այդ հանցագործությունների մասին»։ Միաժամանակ Մդինարաձեն նշել է, որ 2008 թվականի պատերազմի հետաքննության սուբյեկտները չեն լինելու ռազմական ղեկավարներն ու զինվորները։
