Խոհարար-բլոգեր, 33-ամյա Ալեքս Բադոյանը Նինոծմինդայի շրջանի Հեշտիա գյուղից է։ Ալեքս Բադոյանը բարձրագույն տնտեսագիտական կրթություն է ստացել Թբիլիսիում։ Սակայն ժամանակի ընթացքում հասկանալով, որ տնտեսագիտությունն այն չէ, ինչով կցանկանար զբաղվել, 2020 թվականի իրեն փորձում է խոհարարության ոլորտում։ Եվ արդեն 5 տարի է Ալեքսը բացահայտում է համի գաղտնիքը։
Մեր հերոսն արդեն 14 տարի է ապրում և աշխատում է Թբիլիսիում, 2010 թվականին դպրոցն ավարտելուց հետո դուրս է եկել գյուղից։ Ընդունվել և ավարտել է Թբիլիսիի պետական համալսարանի տնտեսագիտության բաժինը, այնուհետև 2016-ից սկսել է աշխատել միջազգային բարեսիրական կազմակերպություն «Կարիտաս Վրաստան»-ում, որտեղ 8 տարի աշխատել է, որպես նախագծերի կոորդինատոր։
Ամեն ինչ սկսվում է 2020 թվականին, երբ «Կարիտաս Վրաստան» կազմակերպության տնօրեն՝ Անահիտ Մխոյանը նկատելով Ալեքսի սերը դեպի խոհանոց։
«Անահիտն առաջարկեց ինձ գնալ հրուշակագործութուն սովորելու, քանի որ Կարիտասը պատրաստվում է բացել առաջին ներառական սրճարանը՝ Թբիլիսիում։ Ծրագրի նպատակը սահմանափակ հնարավորություն ունեցող անձանց ինտեգրացումն է այս ոլորտում։ Եվ «Կարիտաս»-ի շնորհիվ ես գնացի վերապատրաստվեցի մասնագիտացված հրուշակագործության հիմքային կուրսը Թբիլիսիում հայտնի հրուշակագործ Դավիթ Գորգոշիձեի մոտ»։
2022 թվականին՝ Թբիլիսիում բացվում է առաջին սոցիալական-նեռարական (Sweet Heart) սրճարանը, որտեղ Ալեքսը նշանակվում է որպես գլխավոր հրուշակագործ, որտեղ նաև վերապատրաստում է սահմանափակ հնարավորություն ունեցող մոտ 30 երեխաների, ովքեր աշխատունակ են։
«Այդպես սկսվեց իմ մուտքը դեպի խոհարարական աշխարհ, դրանից առաջ ես սիրողական մակարդակի խոհարար էի»։
Փոքրուց, երբ տատը թոնիր էր վառում, Ալեքսն ասում էր, որ ինքը պետք է խմորը հունցի, իսկ տատը ջղայնանում էր իր վրա։
«Ասում էի՝ տատի թող ես շաղեմ խմորը, ջղայնանում էր վրաս թե դա կանացի գործ է»,- ծիծաղով է հիշում տատիկի խոսքերը։
Ալեքսը հայտնի դարձավ, երբ սկսեց որպես ֆուդ–բլոգեր ինսթագրամյան էջ վարել։ Մշո բարբառով նրա պատրաստած ավանդական հայկական գաթան շատերին տարավ դեպի մանկության հիշողություններ ու հայկական արմատներ։ Այդ հոլովակից հետո մեր հերոսը հասկացավ, որ պետք է ինսթագրամին լուրջ վերաբերվել և շարունակել նմանօրինակ ուտեստներ պատրաստել ու ներկայացնել։
Посмотреть эту публикацию в Instagram
«Ինսթագրամում շատ վաղուց էջ ունեի, բայց ակտիվ չէի։ Հիմա, որ այս տեսանյութերը տարածվեցին, Ջավախքից շատ բլոգերներ են ինձ գրում, կիսվում իմ վիդեոներով, առաջարկում են համատեղ հետաքրքիր բաներ կազմակերպել»։
Ալեքսի հետևորդների թիվն օր օրի ավելանում է, աշխատում է տարբեր հետաքրքրությունների տեր մարդկանց գրավել դեպի իր էջ։ Վերջինս ոչ միայն ախորժելի ու ավանդական ուտեստներ է պատրաստում, այլև միաժամանակ ներկայացնում Ջավախքի զբոսաշրջային ներուժը։ Փարվանա լճի վրա, էքստրեմալ պայմաններում՝ սառած լճում ձուկ որսալն ու տեղում պատրաստելը շատերին է գրավել։ Ասում է՝ եթե ներդրողներ լինեն, բազմաթիվ հնարավորություններ կան, կկարողանան զարգացնել զբոշաշրջությունը Ջավախքում, այդ թվում՝ գաստրո-տուրիզմը։
Посмотреть эту публикацию в Instagram
Ալեքսը սովորել է նաև տուրիզմի բաժինը՝ տուրիզմի կառավարում, հյուրանոցային գործ։ Համադրելով խոհարարությունն ու տուրիզմը մեր հերոսը կարողանում է ինքնատիպ ներկայանալ իր հետևորդներին։ Դեռևս սեփական ուժերով է կարողանում ամեն ինչ կազմակերպել, եթե ֆինանսական միջոցները ներեն, ապա անպայման օպերատոր ու մոնտաժող կընդունի աշխատանքի, քանի որ այն իրենից շատ ժամանակ է խլում:
Մտածում է՝ եթե տեղում՝ Ջավախքում, հետաքրքիր մի բան լիներ, ինչ որ սրճարան բացվի հետաքրքիր նախատիպով, այսինքն՝ աշխատատեղ լիներ, սիրով կվերադառնար։
Խոհարարության մեջ նրան ամենաշատը հրապուրում է ստեղծագործելու հնարավորությունը։ Չի սիրում կրկնօրինակել ինչ-որ մեկի բաղադրատոմսը, հակառակը՝ սիրում է միշտ նորություն մտցնել կամ փոխել համերը։
«Ընդհանրապես ես չեմ սիրում քաղցր դեսերտներ, թխվածքներ։ Ես սիրում եմ, երբ թթվայնությունն ու քաղցրությունը բալանսավորված է ու դա իմ մոտ լավ է ստացվում։ Կա ոսկե կանոն, որը միշտ պետք է պահպանես ճիշտ չափաբաժինների դեպքում։
Ալեքս Բադոյանը վստահ է, որ սեփական հաջողության գրավականն այս ոլորտում լիովին կախված է աշխատանքի և մասնագիտության հանդեպ նվիրումից։
«Հաջողության հնարավոր է հասնել միայն աշխատասիրությամբ, երբեք չհանձնվելով։ Եթե ես ինչ-որ բան եմ ուզում, ապա անպայման պիտի հասնեմ դրան, լինի դա դժվար կամ շատ խնդիրներով, ես պետք է հասնեմ։ Շատ կարևոր է արածդ գործը սիրես»։
Ալեքսը երազում է հայտնի խոհարար դառնալ, ձգտում է Միշելինի աստղին, իր համար շատ կարևոր է, որ իր մասնագիտության մեջ առաջինը լինի։
«Ես շատ բան ունեմ սովորելու բայց պետք է ձգտվեմ։ Հիմա առաջնային նպատակներից է, որ Փարիզում սովորեմ՝ բուլանժերիա, դա իմ երազանքներից մեկն է»։
Посмотреть эту публикацию в Instagram
Չնայած Ալեքսը հիմնականում ավանդական, հայկական ու վրացական ուտեստներ է պատրաստում ու ներկայացնում իր բլոգում, բայց ուզում է իրեն նվիրել հրուշակագործությանը։
Ջավախքյան ավանդական խոհանոցի առանձնահատկությունները նորովի ներկայացնելու ու պահպանելու համար մեր հերոսը որոշել է իր ուսումնասիրություններն անել։
«Մի քանի օր առաջ նամակ ստացա մեր գյուղից մի կին գրել էր, որ գիրք կա հայկական խոհանոցի մասին, որտեղ առանձնացված է Մշո կերակրատեսակներ։ Հիմա նոր-նոր սկսել եմ ուսումնասիրություններ անել։ Ես պատրաստում եմ այն, ինչ հիշում եմ մանկությունից, մեր մեծերն ինչպես են պատրաստել, դրա համար ես չեմ կարող ասել, որ օրինակ՝ ձավարով տոլման Մշո կերակրատեսակ է, սկզբունքը նույնն է, ուղղակի ամեն մեկը մի համեմունք, մի բան ավելացնելով ու պակասացնելով է անում»։
Խոհարար Ալեքս Բադոյանի նպատակներից է հայկական խոհանոցի գաթայի համն ու հոտը տարածել աշխարհով մեկ, այդպիսով ավելի ու ավելի շատ մարդկանց համար հասանելի դարձնելով այն։
