Թբիլիսիում բողոքի ցույցերը նոր թափ են առել, քաղաքացիներն այսօր հավաքվել են Tbilisi Mall-ի հարակից տարածքում, փորձելով փակել քաղաք մտնող գլխավոր մայրուղին: Ոստիկանների և ցուցարարների միջև բախումներ են տեղի ունեցել, այս պահին կան տուժածներ և ձերբակալվածներ:
Չնայած այն բանին, որ ՆԳՆ-ն նախազգուշական հայտարարություն էր տարածել կանխելու համար Թբիլիսիի մուտքի մոտ կազմակերպվող ցույցը, միևնույն է՝ ցուցարարները հավաքվել էին նախատեսված վայրում: Մոբիլիզացված ՆԳՆ համապատասխան ստորաբաժանումների ներկայացուցիչները փորձել են խոչընդոտել քաղաքացիների ցույցին, որից հետո սկսվել են բախումներ:
Ոստիկանական ուժերը ֆիզիկապես հարձակվում և բերման են ենթարկում բողոքի ակցիայի մասնակիցներին. ձերբակալվել է «Հանուն փոփոխությունների» կոալիցիայի առաջնորդներից Նիկա Մելիան, բերման ենթարկվածների թվում են նաև քաղաքական այլ գործիչներ՝ Գիգի Ուգուլավան,Գիորգի Կիրթաձեն և Թենգո Թևզաձեն, ինչպես նաև Դիմա Բիձինաշվիլին, վիրավորվել է TV Pirveli-ի օպերատոր Նիկո Կոկայան։
Tbilisi Mall-ի մոտ հավաքվածները երթով շարժվել են դեպի Թբիլիսի քաղաքային դատարան։ Ոստիկանները նրանց թույլ չեն տալիս ամբողջությամբ փակել ճանապարհը և ֆիզիկապես առերեսվել են քաղաքացիների հետ։
Համացանցում ակտիվ տարածվում են կադրեր, որտեղ երևում է թե ինչպես են ոստիկանները բռնի ուժ գործադրում, հայհոյում և ձերբակալում ցույցի մասնակիցներին:
Նշենք, որ այս պահի դրությամբ բողոքի ցույցեր են անցկացվում նաև այլ քաղաքներում։ Ցուցարարների պահանջը մնում է նույնը՝ նոր ընտրություններ և ռեժիմի բանտարկյալների ազատ արձակում:
