Վրաստանի արտաքին գործերի նախարար Մակա Բոճորիշվիլին այսօր Երեւանում հույս է հայտնել, որ «Հայաստանի և Ադրբեջանի միջև խաղաղության պայմանագիրը կամփոփվի այնպիսի դրույթներով, որոնք երկուստեք ընդունելի կլինեն»:
«Միայն դա կարող է հիմք հանդիսանալ տարածաշրջանում կայունության համար։ Պատրաստ ենք համագործակցել մեր հարևանների հետ:
Երբ խոսում ենք խաղաղության, անվտանգության մարտահրավերների մասին այս տարածաշրջանում, պետք է նշենք նաև այն մարտահրավերները, որոնք գալիս են Ռուսաստանից, որը բռնակցել է Վրաստանի որոշ շրջաններ»,- Հայաստանի արտաքին գործերի նախարար Արարատ Միրզոյանի հետ ճեպազրույցում ասել է Մակա Բոճորիշվիլին:
Նա նշել է, որ Վրաստանը և Հայաստանը հարգում են միմյանց ինքնիշխանությունը և տարածքային ամբողջականությունը:
«Վրաստանը ողջունում է Հայաստանի գործընկերությունը ԵՄ-ի, ԱՄՆ-ի հետ։ Կարծում եմ՝ սա շատ օգտակար կլինի ընդհանուր տարածաշրջանի համար»,- ասել է Մակա Բոճորիշվիլին:
Իր հերթին ՀՀ արտգործնախարար Արարատ Միրզոյանն ասել է, որ «Հայաստանը ցանկանում է ոչ միայն հայ-ադրբեջանական, այլև՝ հայ-վրացական սահմանի սահմանազատում»:
«Մենք հավատարիմ ենք թե խաղաղության պայմանագրին, թե «Խաղաղության խաչմերուկին», թե տրանսպորտային ենթակառուցվածքների ապաշրջափակմանը, թե սահմանազատման գործընթացին»,- ասել է Արարատ Միրզոյանը:
