Այս տարի հոկտեմբերի 4-ին մունիցիպալիտետները կընտրեն տեղական ինքնակառավարման մարմիններին, պատգամավորներին և քաղաքապետերին։ Հաշվի առնելով Վրաստանում ներքաղաքական լարված իրավիճակը՝ դեռևս չի զգացվում ընտրությունների մոտալուտ լինելը։ Ախալքալաքում սովորաբար իշխող կուսակցությունն է սկսում նախապատրաստվել ընտրություններին, իսկ հետո ընտրությունների նախօրեին ակտիվանում են նաև ընդդիմադիր կուսակցությունները, սակայն այս տարի ընտրություններին նախապատրաստվելու առաջին ակտիվությունը զգացվեց Գախարիայի «Հանուն Վրաստանի» կուսակցության կողմից:
Վրաստանում տեղական ինքնակառավարման մարմինների վերջին ընտրություններն անցկացվել են 2021 թվականին։ 2025 թվականի ընտրական տարին սկսվել է քաղաքական լարվածության մթնոլորտում. ընդդիմությունը և հասարակության զգալի մասը չեն ճանաչում 2024 թվականի խորհրդարանական ընտրությունների արդյունքները, իսկ նոյեմբերի 28-ից ամեն օր բողոքի ակցիաներ են անցկացվում, որոնց պահանջներից մեկը նոր ընտրություններ անցկացնելն է։ Այս պայմաններում հատկապես կարևորվում են 2025 թվականի ՏԻՄ ընտրությունները։ 2024 թվականի խորհրդարանական ընտրությունների Կենտրոնական ընտրական հանձնաժողովի արդյունքների համաձայն՝ «Վրացական երազանքը» չի կարողացել հավաքել ձայների 50 տոկոսը՝ Թբիլիսի, Ռուսթավի, Քութաիսի, Բաթումի և Ծալենջիխա քաղաքներում, ինչը մեծացնում է այդ քաղաքներում մունիցիպալ ընտրություններում նրա պարտության հավանականությունը։
Մինչ այժմ ընդդիմությունը որևէ շոշափելի աշխատանք չի իրականացրել 2025 թվականի տեղական ինքնակառավարման մարմինների ընտրություններին նախապատրաստվելու համար, հատկապես Ջավախքում, սակայն Գախարիայի «Հանուն Վրաստանի» կուսակցության Սամցխե-Ջավախքի ներկայացուցիչն ակտիվորեն աշխատում է Ախալքալաքում և Նինոծմինդայում՝ կողմնակիցներ և աշխատողներ գտնելու համար։
«Իհարկե, ընտրություններից անմիջապես հետո հենց երկրորդ օրը պետք է սկսել նախապատրաստվել նոր ընտրություններին: Ինչ վերաբերում է վերջին ընտրություններին, դուք գիտեք, մենք չենք ճանաչում այս ընտրությունները: Մենք հուսով ենք, որ կլինեն նոր խորհրդարանական ընտրություններ, և դրանք կանցկացվեն այլ պայմաններում, ավելի արդար, որտեղ իշխող կուսակցության կողմից նման ճնշումներ չեն լինի մարդկանց վրա: Հուսով ենք, որ մինչև նոր խորհրդարանական ընտրությունները և ՏԻՄ ընտրությունները կլինի ավելի ազատ միջավայր: Եվ, գիտեք, ոչ միայն ավելի ազատ, այլև՝ առանց վախի: Սա շատ կարևոր է, քանի որ մարդիկ վախենում են խոսել իրենց կարիքների մասին»,- ասում է Սամցխե-Ջավախքում կուսակցության տարածաշրջանային ներկայացուցիչ Սոփիկո Խորգուանին։
Նրա կարծիքով, հաջորդ ընտրություններում ի վնաս իշխող կուսակցության վարչական ռեսուրսի օգտագործման վրա կազդեն նաև վերջին փոփոխությունները, որոնք վերաբերում են մունիցիպալ բոլոր աշխատակիցների ըստ պայմանագրերի աշխատելուն։
«Վերջին, այսպես կոչված, օրինագծերը և օրենսդրական փոփոխություններն ազդեցին նույնիսկ այն մարդկանց վրա, ովքեր իրենց ամենապաշտպանված էին զգում: Մեր պետական ծառայողները: Մենք ունեինք շատ նորմալ օրենք, և մենք բոլորս գիտեինք, որ մեր պետական ծառայողները վերապատրաստվել էին և արդեն սովորել էին որոշ հիմնական օրենքներ և ինչպես պետք է կառավարեին ու որոշումներ կայացնեին: Սկսել էին պայքարել բյուրոկրատիայի դեմ, որը մեր մոտ կա։ Հիմա այս մարդիկ լրիվ անպաշտպան են մնացել։ Իշխանություն կոչվածը, իշխող կուսակցությունը կարծում էր, որ այս վախով ավելի շատ կպահեին նրանց՝ ամբողջ պետական ծառայողների այս մի մեծ բանակին։ Ես կարող եմ ձեզ ասել, որ դա հակառակ ձևով աշխատեց: Քանի որ այս մարդիկ իրենց անպաշտպան են զգում, նրանք գիտեն, որ եթե նույնիսկ օրինապաշտ լինեն, միևնույն է, եթե ինչ-որ մեկին իրենք դուր չգան, կարող են աշխատանքից ազատվել: Այնպես որ, դա աշխատում է իշխող կուսակցության դեմ»:
«Հանուն Վրաստանի» կուսակցությունն արդեն թիմ է հավաքում շրջաններում, նրանք ունեն իրենց կոնկրետ պայմաններն ու չափանիշները։
«Սա է մեր դիրքորոշումը ժամանակակից երկրի, ժամանակակից պետության համար, շատ կարևոր է, որ տեղական իշխանությունները, ինքնակառավարումը լինեն ուժեղ և անկախ: Հետևաբար, ամենակարևորն այն է, որ նրանք լինեն մարդիկ, ովքեր կարող են պատասխանատվություն ստանձնել, պատրաստ լինել կառավարելու իրենց շրջանը: Հենց այդ պատճառով, մենք, իհարկե, փնտրում ենք մարդկանց, ազնիվ մարդկանց, մարդկանց, ովքեր գիտեն իրենց գործը և սիրում են իրենց շրջանը և իրենց երկիրը: Առանց սիրո ոչինչ չի ստացվում։ Նրանք պետք է սիրեն իրենց գյուղը, իրենց քաղաքը և այստեղ ապրող մարդկանց։ Մենք, իհարկե, նման մարդկանց ենք փնտրում։ Եվ ես նաև երաշխավորում եմ, որ յուրաքանչյուր առաջինը կամ երկրորդը անպայման իգական սեռի կլինի։ Սա մեր որոշումն է։ Եվ մենք հրավիրում ենք կանանց: Հուսով ենք, որ կանայք նույնպես կհամարձակվեն և կգնան քաղաքականություն»,- ասում է Գախարիայի «Հանուն Վրաստանի» կուսակցության ներկայացուցիչը։
