Ջավախքում անցկացվող ցանկացած միջոցառում ուղեկցվում է հրավառություններով։ Այն համարվում է կարևոր բաղադրիչ, բայց վերջին շրջանում երկրում տիրող իրավիճակից ելնելով, սահմանվեցին որոշակի արգելքներ և տուգանքներ, կապված պիրոտեխնիկայի օգտագործման հետ։
Թբիլիսիում եվրոպամետ ցույցերն ուղեկցվեցին պիրոտեխնիկայի օգտագործմամբ։ 2024 թվականի նոյեմբերի 28-ի ցույցերից հետո, երբ ցուցարարները օգտագործեցին պիրոտեխնիկա, կառավարությունն ընդունեց օրենք, ըստ որի, ցուցարն իրավունք չունի ցույցի ժամանակ ունենալ պիրոտեխնիկա։ Հաշվի առնելով տիրող իրավիճակը, երկրում խստացվեց պիրոտեխնիկայի առք ու վաճառքը։
Ըստ ընդունված օրենքի՝ պիրոտեխնիկա ներմուծելու, արտահանելու, արտադրելու և վաճառելու համար անձը պետք է ունենա հատուկ թույլտվություն՝ լիցենզիա, որը ձեռք բերելու համար անհրաժեշտ է վճարել 200 լարի։ Եթե անձը ցանկանում է, որ թույլտվություն ստանա 10 աշխատանքային օրվա ընթացքում, ապա պետք է վճարի 1000 լարի, իսկ 20 աշխատանքային օրում վճարը կազմում է 500 լարի։ Հատուկ թույլտվություն չունենալու դեպքում անձը կտուգանվի 5000 լարիի չափով, իսկ նույն իրավախախտումը երկրորդ անգամ կրկնելու դեպքում՝ 6000 լարիի չափով։
Ինչպես նկատեցիք, խստացած օրենքները և տուգանքները վերաբերվում են պիրոտեխնիկա ներմուծելուն ու արտահանելուն, արտադրելուն ու վաճառելուն։ Այս ամենն իր ազդեցությունն ունեցավ Ախալքալաքի շրջանի բնակիչների տոնական տրամադրության վրա։ Մարդիկ, կասկածելով, որ հրավառության համար կտուգանվեն, երբեմն խուսափում են հրավառություններից։
Պիրոտեխնիկայի օգտագործումը թույլատրելի է, բայց գործում են որոշակի արգելքներ։ Հրավառությունը առաջացնում է ակուստիկ աղմուկ։ Ըստ օրենքի, գիշերային ժամերին, սկսած՝ 23։00-ից մինչև 08։00-ն ընկած ժամանակահատվածում արգելվում է աղմուկ առաջացնել, հետևաբար, նշված ժամանակահատվածում պիրոտեխնիկայի օգտագործումը համարվում է իրավախախտում։
Գիշերը պիրոտեխնիկական արտադրանք օգտագործելու համար ֆիզիկական անձը կտուգանվի 150 լարիով, իսկ իրավաբանական անձը՝ 500 լարի։ Իրավախախտումը կատարելուց 1 տարի հետո նույն գործողության երկրորդ և հաջորդող կատարման ժամանակ ֆիզիկական անձը կտուգանվի 300 լարիով, իսկ իրավաբանական անձը՝ 1000 լարիով։
