Թբիլիսիի պետական համալսարանի որոշ ուսանողներ փոխում են բողոքի ձևը և շարունակում են մնալ ԹՊՀ առաջին մասնաշենքում։ Իրենց խոսքով, կմնան այնքան ժամանակ, որքան անհրաժեշտ է, մյուս բուհերի ուսանողներին նույնպես կոչ են անում միանալ բողոքի այս ձևին։ Ուսանողները կոչ են անում նաև բուհի ղեկավարությանը և ռեկտորին հայտնել իրենց դիրքորոշումը ստեղծված իրավիճակի վերաբերյալ։
Ուսանողներից որոշները գիշերում են համալսարանում։ Նրանք նաև գրքեր են հավաքում այն բանտարկյալների համար, ովքեր անազատության մեջ են ցույցերին մասնակցելու պատճառով:
«Մեր համակուրսեցիները ճաղերի հետևում են։ Այս պահին սեմինարների ու դասախոսությունների մասին մտածելը միանգամայն անընդունելի է։ Ավելին, նույնիսկ այս ձեռք բերած գիտելիքներն ապարդյուն կլինեն, քանի որ վրացական դիպլոմը կորցնում է ճանաչումը երկրի սահմաններից դուրս, և մենք մնում ենք մեկուսացման մեջ: Մենք կշարունակենք պայքարել այնքան ժամանակ, մինչև մեր ընկերները ազատության մեջ լինեն:
Մեր այստեղ հավաքվելու պատճառը մի բան է՝ փոխում ենք ռուսական ռեժիմի դեմ պայքարի մարտավարությունը, եթե մինչ այժմ փողոցում կանգնած ու այնտեղից մեր ձայնն էինք բարձրացնում, հիմա մենք գտնվում ենք կրթական կենտրոնում՝ համալսարանում, և այստեղ կմնանք այնքան, որքան անհրաժեշտ է», – հայտնել էին ուսանողները օրերս արված հայտարարության մեջ։
Նշենք նաև, որ պարբերաբար լինում են բախումներ ուսանողների և անվտանգության աշխատակիցների միջև:
