Վրաստանի պատմության մեջ ամենախոշոր ներդրումը` Emaar Properties/Eagle Hills ծրագրավորող ընկերությունը Վրաստանում կներդնի 6 մլրդ ԱՄՆ դոլար։ Ընկերության և վրացական կողմի միջև համագործակցության հուշագիր է ստորագրվել Աբու Դաբիում՝ Վրաստանի վարչապետ Իրակլի Կոբախիձեի այցի ընթացքում։
Ստորագրման արարողությունը տեղի է ունեցել Արաբական Միացյալ Էմիրությունների նախագահի նստավայրում, որին ներկա են եղել Վրաստանի վարչապետ Իրակլի Կոբախիձեն և ԱՄԷ նախագահ Շեյխ Մուհամեդ բին Զայեդ Ալ Նահայանը։
Վրացական կողմից փաստաթուղթը ստորագրել են առաջին փոխվարչապետ, էկոնոմիկայի և կայուն զարգացման նախարար Լևան Դավիթաշվիլին և Աջարիայի Ինքնավար Հանրապետության կառավարության նախագահ Թոռնիկե Ռիժվաձեն, իսկ ընկերության կողմից՝ հիմնադիր և գործադիր տնօրեն Մուհամեդ Ալի Ռաշեդ Ալաբարը։
Վրաստանի պատմության մեջ ամենամեծ ներդրման մասին համաձայնագիրը նախատեսում է զարգացման երկու խոշոր ներդրումային նախագծերի մշակում, որոնց վրա արդեն մի քանի ամիս է աշխատում են Էկոնոմիկայի և կայուն զարգացման նախարարությունը և Աջարիայի Ինքնավար Հանրապետության կառավարությունը։ Նախագծերի նախնական ուսումնասիրությունն ու գնահատումն արդեն ավարտված է։
Վրաստանի կառավարության ղեկավարի խոսքով, նման մասշտաբի ներդրումը երկրի կառուցապատման ոլորտի զարգացումը որակապես նոր մակարդակի կհասցնի։
«Այսօր մենք ստորագրեցինք հուշագիր, որը նախատեսում է աննախադեպ ներդրում մեր երկրում։ Սա 6 միլիարդ դոլարի ներդրում է, որը կիրականացվի Վրաստանում ներդրումային գործունեության եզակի փորձ ունեցող ընկերության՝ հայտնի Emaar խմբի կողմից: Կիրականացվի բազմաֆունկցիոնալ կառուցապատման նախագիծ, կզարգացվեն բազմաֆունկցիոնալ ենթակառուցվածքներ երկու ուղղությամբ՝ Թբիլիսիում և Բաթումիում ու Գոնիոյում։ Այս ամենը զգալիորեն կնպաստի մեր երկրի տնտեսական զարգացմանը, կարագացնի տնտեսական աճի տեմպերը, կստեղծի նոր աշխատատեղեր և էլ ավելի շատ ներդրողների կգրավի Վրաստան։ Ցանկանում եմ շնորհակալություն հայտնել մեր գործընկերներին, ընկերներին, Արաբական Միացյալ Էմիրությունների իշխանություններին և Emaar խմբին, նրա ղեկավար պարոն Ալաբբարին և բոլորին համագործակցության և այսօրվա համաձայնագրի համար, որն առանձնահատուկ նշանակություն կունենա մեր երկրի տնտեսական զարգացման համար»,- ասել է վարչապետը։
