Ախալքալաքի հիվանդանոցն աշխատում է մասնագետ (նեֆրոլոգ) ներգրավելու և հեմոդիալիզի սենյակում լրացուցիչ սարքավորումներ ավելացնելու ուղղությամբ, որպեսզի կենտրոնը կարողանա սպասարկել երիկամային անբավարարությամբ ավելի շատ բուժառուների, ովքեր ստիպված են շաբաթը երեք անգամ մեկնել Ախալցիխե հեմոդիալիզի համար, չնայած հիվանդության պատճառով իրենց ընդհանուր թուլության:
Երիկամային անբավարարություն ունեցող Ախալքալաքի և Նինոծմինդայի մունիցիպալիտետների բնակիչների համար տասնամյակների ընթացքում կարևորագույն խնդիրներից մեկը հեմոդիալիզի պրոցեդուրաների տեղում առկայությունն է, քանի որ այս խնդրով հիվանդները պետք է սիստեմատիկ անցնեն այս պրոցեդուրան, իսկ հյուծող ճանապարհը էլ ավելի է բարդացնում այդ մարդկանց առանց այն էլ դժվար կյանքը: Այս խնդիրը, ըստ երևույթին, լուծվել էր 2023 թվականին՝ Ախալքալաքի հիվանդանոցում հեմոդիալիզի կաբինետի բացմամբ, սակայն պրոցեդուրան տեղում, այսինքն՝ Ախալքալաքի հիվանդանոցում, հասանելի է ընդամենը 8 բուժառուի համար, մինչդեռ Ախալքալաքից և Նինոծմինդայից այս պրոցեդուրան անհրաժեշտ է 30-35 հիվանդի, ըստ հիվանդանոցի տվյալների։
Ախալքալաքի հիվանդանոցի հեմոդիալիզի կաբինետում կա ընդամենը 4 ապարատ՝ «արհեստական երիկամ»։ Բացի տեխնիկական մասից, հիվանդանոցում միշտ նշել են կադրերի խնդիրը՝ այս ծառայության մատուցման հարցում, սակայն, ինչպես վստահեցնում է հիվանդանոցի մենեջեր Ալեքսան Թորոյանը, առաջիկայում երկու հարցերն էլ լուծում կստանան։
«Մենք բանակցում ենք Նինոծմինդայից բժշկի հետ: Նա արդեն 3 տարի աշխատում է Թբիլիսիի առաջատար հեմոդիալիզի կենտրոններից մեկում, տիրապետում է ախտորոշման մեթոդներին ու հեմոդիալիզի բոլոր պրոցեդուրաներին։ Մենք եկել ենք ընդհանուր հայտարարի, մինչև փետրվարի 10-ը կունենանք վերջնական պայմանավորվածություն: Նա կվերադառնա շրջան և կաշխատի Ախալքալաքում։ Ներկայումս մենք իրականացնում ենք հեմոդիալիզի սեանսներ 8 բուժառուի համար, շաբաթական 3 օր, երկու հերթափոխով։ Նախատեսում ենք պրոցեդուրան իրականացնել ամեն օր, եթե անհրաժեշտություն լինի՝ 3 հերթափոխով։ Մենք նաև ներկայումս զբաղված ենք, որպեսզի ավելացնենք քանակը և արդիականացնենք առկա սարքավորումներն ավելի որակյալներով: Այս հարցը դրվել է մեր ղեկավարության առջև։ Հուսով եմ, որ կլուծենք, այդ դեպքում կկարողանանք ծառայություններ մատուցել 22-ից 25 բուժառուի։ Տեխնիկական հարցեր և խնդիրներ կան, որոնք մենք պետք է լուծենք»,- ասում է Ալեքսան Թորոյանը։
